دنیا کا سب سے وزنی قیدی جیل انتظامیہ کے لیے سر درد بن گیا

ویانا: آسٹریا میں 300 کلوگرام وزنی سزا یافتہ قیدی نے جیل انتظامیہ کو مشکلات میں ڈال دیا ہے، قیدی کو منشیات برآمدگی کیس میں گرفتار کیا گیا تھا جس میں 45 کلوگرام چرس، 2 کلو کوکین، 2 کلو ایمفیٹامین اور 2 ہزار سے زائد ایکسٹسی گولیاں شامل تھیں۔

ابتدا میں اسے ویانا کی جوزفسٹڈ جیل میں رکھا گیا لیکن اپنے بھاری وزن کے باعث اس نے جیل کا بیڈ توڑ ڈالا جس کے بعد اسے 15 کلومیٹر دور کورنیوبرگ منتقل کرنا پڑا۔

غیر ملکی میڈیا رپورٹس کے مطابق 29 سالہ قیدی کا وزن 300 کلو گرام ہے، جس کی دیکھ بھال پر ریاست کو اوسط قیدی کی نسبت 10 گنا زیادہ خرچ کرنا پڑ رہا ہے۔ اس کے لیے جیل میں خصوصی انتظامات کیے گئے ہیں جن میں ویلڈڈ چارپائی اور نرسز کی 24 گھنٹے نگرانی شامل ہے۔

رپورٹ میں مزید بتایا گیا ہے کہ اس کی دیکھ بھال پر روزانہ تقریباً 1800 یورو خرچ ہو رہے ہیں۔

اس انکشاف پر آسٹریا کے عوام میں شدید غم و غصہ کا رد عمل سامنے آ رہا ہےاور سوال اٹھائے جا رہے ہیں کہ ٹیکس دہندگان کے پیسے ایک منشیات کے مجرم کی دیکھ بھال پر کیوں ضائع کیے جا رہے ہیں۔