وفاقی حکومت نے نئے این ایف سی ایوارڈ کے لیے گیارہواں قومی مالیاتی کمیشن تشکیل دے دیا

وفاقی حکومت نے قومی محاصل کی صوبوں میں تقسیم کے نئے فارمولے کے لیے گیارہواں قومی مالیاتی کمیشن (این ایف سی) تشکیل دے دیا ہے۔ وزیر خزانہ کمیشن کے چیئرمین ہوں گے جبکہ کمیشن میں چاروں صوبوں کے وزرائے خزانہ اور چار نامزد ماہرین بھی شامل ہوں گے۔

وزارت خزانہ کے نوٹیفکیشن کے مطابق، آئین کے آرٹیکل 160 کی شق (1) کے تحت صدر مملکت نے اس کمیشن کی تشکیل کی منظوری دی ہے۔ اس کے ساتھ ہی 21 جولائی 2020ء کو جاری ہونے والا پرانا نوٹیفکیشن منسوخ کر دیا گیا ہے، اور سابقہ این ایف سی کو تحلیل تصور کیا جائے گا۔

کمیشن کے اراکین میں پنجاب سے ناصر محمود کھوسہ، سندھ سے ڈاکٹر اسد سعید، خیبرپختونخوا سے ڈاکٹر مشرف رسول سیان، اور بلوچستان سے فرمان اللہ شامل ہیں۔ نوٹیفکیشن کے مطابق، این ایف سی کا بنیادی مقصد وفاق اور صوبوں کے درمیان ٹیکسوں کی خالص آمدن کی تقسیم، صوبوں کو گرانٹس، قرضوں کے اختیارات، مشترکہ مالی ذمہ داریاں اور دیگر مالیاتی امور پر سفارشات دینا ہے۔

ذرائع کے مطابق، کئی برسوں سے قومی وسائل پر پرانے این ایف سی ایوارڈ کے تحت عمل ہو رہا تھا اور صوبوں کی جانب سے نئے ایوارڈ کا مطالبہ بڑھ رہا تھا۔ اس کے ساتھ ہی آئی ایم ایف نے بھی اخراجات میں کمی پر زور دیا ہے۔ بتایا جا رہا ہے کہ نئے ایوارڈ میں صوبوں کا حصہ کارکردگی سے مشروط کرنے، گلگت بلتستان اور آزاد کشمیر کے لیے فنڈ مختص کرنے اور بڑے ڈیمز کے منصوبوں کے لیے حصہ نکالنے کی تجاویز زیر غور ہیں۔

موجودہ فارمولے کے تحت صوبوں کو 57.5 فیصد حصہ ملتا ہے، تاہم اس پر نظرثانی کی تجویز سامنے آئی ہے۔ اس کے علاوہ، آبادی کے فارمولے کا وزن 82 فیصد سے کم کرنے کی بھی سفارش کی گئی ہے۔

وزارت خزانہ کے مطابق، وفاق کو پچھلے مالی سال میں 7 ہزار 444 ارب روپے خسارے کا سامنا رہا، جب کہ رواں سال کے لیے خسارہ 6 ہزار 501 ارب روپے متوقع ہے۔ صرف قرضوں پر سود کی ادائیگی کے لیے 8 ہزار 207 ارب روپے درکار ہیں۔

نیا این ایف سی کمیشن ان تجاویز پر غور کرے گا اور وفاق و صوبوں کی مشاورت سے نیا این ایف سی ایوارڈ مرتب کیا جائے گا۔