وفاقی حکومت کااسلام آباد میں گاڑیوں کی رجسٹریشن فیس اور ٹوکن ٹیکس میں اضافے کا فیصلہ

اسلام آباد: وفاقی حکومت کی جانب سے اسلام آباد میں گاڑیوں کے ٹوکن ٹیکس ، رجسٹریشن اور ٹرانسفر کی فیسوں میں اضافہ کرنے کا فیصلہ کیا گیا ہے۔

تفصیلات کے مطابق وفاقی کابینہ نے ویسٹ پاکستان موٹر وہیکل ٹیکسیشن ایکٹ 1958میں ترامیم کی منظوری دے دی، جس کے ذریعے پرائیویٹ پبلک سروس اور کمرشل گاڑیوں کے ٹوکن ٹیکس میں اضافے کا اختیار دیا جا رہا ہے۔

 اس حوالے سے وزارت داخلہ کا کہنا ہے کہ موجودہ ٹوکن ٹیکس اور دیگر ریٹ 2019 سے تبدیل نہیں کیے گئے، ٹوکن ٹیکس کو صوبائی حکومتوں کے مساوی کیا جائے گا۔

وزارت داخلہ کا کہنا ہے کہ ٹوکن ٹیکس اور دیگر فیسیں نہ بڑھانے سے ایکسائز اینڈ ٹیکسیشن (ای ٹی او) آفس کی کارکردگی متاثر ہو رہی ہے۔

اس سے قبل وفاقی کابینہ کی جانب سے فیسوں اور ٹوکن ٹیکس میں اضافے کے تعین کا اختیار وزارت داخلہ کو دینے کی منظوری دی گئی ہے۔