نیو کراچی میں آگ سے متاثرہ گارمنٹس فیکٹری منہدم

کراچی کے علاقے نیو کراچی میں آگ سے متاثرہ گارمنٹس فیکٹری منہدم ہوگئی ہے، عمارت کے ملبے تلے ریسکیو اہلکاروں کے دبے ہونے کا خدشہ ہے، عمارت گرتے ہی زوردار دھماکا ہوا ہے۔

کراچی کے علاقے نیوکراچی سیکٹر ایٹ اے میں گارمنٹس فیکٹری میں آتشزدگی کا واقعہ پیش آیا ہے جس کے بعد فائر بریگیڈ کی 10 گاڑیاں آگ بجھانے میں مصروف ہیں۔ فیکٹری کی عمارت گرتے ہی زور دار دھماکا ہوا جس کے باعث نجی ٹی کا کیمرہ مین اور 6 فائر فائٹرز زخمی ہوگئے ہیں۔

رپورٹس کے مطابق نیو کراچی انڈسٹریل ایریا میں واقع تین منزلہ الزیب نامی فیکٹری کے گراونڈ فلور پر صبح سات بجے آگ لگی تھی، آگ نے ساتھ والی عمارت کو بھی اپنی لپیٹ میں لے لیا۔

فائر بریگیڈ کے مطابق ابتدائی طور پر دو گاڑیاں بھیجی گئی تھیں لیکن آگ کی شدت بڑھنے پر مزید گاڑیاں طلب کی گئیں۔ مجموعی طور پر 15 فائر ٹینڈر اور اسنارکل آگ پر قابو پانے کی کوشش کررہی ہیں جبکہ آپریشن کے دوران ایک فائر فائٹر زخمی بھی ہوا ہے۔

فائر بریگیڈ کے مطابق پانی اور فوم کی مدد سے آگ پر کنٹرول کرنے کی کوشش کی جارہی ہے۔