افغانستان میں گرفتار برطانوی جوڑا 8 ماہ بعد قطری ثالثی سے رہا

کابل: طالبان نے رواں سال فروری میں افغانستان میں گرفتار کیے گئے برطانوی جوڑے کو رہا کر دیا، جس کے بعد وہ جمعے کے روز قطری ثالثی کے نتیجے میں دوحہ روانہ ہو گئے۔

غیر ملکی خبر رساں ایجنسی رائٹرز کے مطابق، 76 سالہ باربی رینالڈز اور 80 سالہ پیٹر رینالڈز کی صحت سے متعلق ان کے اہل خانہ کو شدید خدشات لاحق تھے۔

طیارے میں سوار ہونے سے قبل باربی رینالڈز نے میڈیا سے گفتگو کرتے ہوئے کہا "اگر ممکن ہوا تو ہم دوبارہ افغانستان لوٹیں گے کیونکہ ہم افغان شہری ہیں۔ اس وقت ہماری اولین خواہش ہے کہ ہم اپنے بچوں اور خاندان سے دوبارہ ملیں۔"

رائٹرز کے مطابق، ذرائع نے بتایا کہ قطر نے اس جوڑے کی رہائی کے لیے برطانوی حکومت اور اہل خانہ کے ساتھ مل کر طالبان حکام سے کئی ماہ تک مذاکرات کیے۔

رہائی سے قبل 8 ماہ کی حراست کے دوران، کابل میں قطری سفارتخانے نے جوڑے کو مسلسل سہولیات فراہم کیں جن میں ڈاکٹر تک رسائی، ضروری ادویات اور اہل خانہ سے رابطہ شامل تھا۔

افغان وزارتِ خارجہ نے اپنے ایک بیان میں کہا کہ برطانوی جوڑے نے افغان قوانین کی خلاف ورزی کی تھی، تاہم اس کی مزید تفصیلات فراہم نہیں کی گئیں۔

دوسری جانب، بی بی سی کے مطابق ذرائع کا کہنا ہے کہ انہیں ایک ایسا طیارہ استعمال کرنے پر حراست میں لیا گیا جس کے بارے میں حکام کو اطلاع نہیں دی گئی تھی۔

یہ جوڑا گزشتہ 18 برس سے افغانستان میں مقیم تھا اور ایک فلاحی منصوبہ چلا رہا تھا، جسے طالبان حکومت نے 2021 میں باضابطہ منظوری دی تھی۔