محکمہ موسمیات کی ملک کے چند مقامات پر گرج چمک کے ساتھ بارش کی پیشگوئی

ویب ڈیسک: محکمہ موسمیات نے ملک کے چند مقامات پر گرج چمک کے ساتھ بارش کی پیشگوئی کر دی۔

تفصیلات کے مطابق محکمہ موسمیات کا کہنا ہے کہ آج ملک کے بیشتر علاقوں میں موسم خشک اور گرم رہنے کا امکان ہے،اسلام آباد میں بھی موسم خشک اور گرم ر ہے گا۔ 

محکمہ موسمیات کے مطابق لاہورشہر کا مطلع صاف، موسم گرم اور خشک رہے گا جبکہ آئندہ چوبیس گھنٹوں کےدوران بارش کا کوئی امکان نہیں ظاہر نہیں کیا گیا،اسی طرح جہلم اور چکوال میں چند مقامات پر گرج چمک کے ساتھ بارش کی توقع ہے،جبکہ بلوچستان کے بیشتر اضلاع میں موسم گرم اور خشک رہے گا۔

محکمہ موسمیات کے مطابق سندھ کے ساحلی علاقوں میں مطلع جزوی ابر آلود رہے گا جبکہ خیبرپختونخوا کے میدانی اضلاع میں موسم گرم اور خشک رہنے کا امکان ہے،آزاد کشمیر اور گلگت بلتستان میں بھی موسم گرم اور خشک رہنے کا امکان ہے۔

 گزشتہ چوبیس گھنٹوں کے دوران ملک کے بیشتر علاقوں میں موسم گرم اور خشک رہا ،تاہم بالائی پنجاب اور بالائی خیبر پختونخوا میں چند مقامات پر تیز ہواؤں اور گرج چمک کے ساتھ بارش ہوئی۔

واضح رہے کہ ڈائریکٹر جنرل پروونشل ڈیزاسٹر مینجمنٹ اتھارٹی پنجاب (پی ڈی ایم اے) عرفان علی کاٹھیا نے گزشتہ روز کہاتھا کہ مون سون کا سیزن ختم ہو گیا ہے، آئندہ ہفتے کسی بارش کا امکان نہیں، سیلاب زدہ علاقوں سے پانی اب نکلنا شروع ہو گیا ہے۔

ان کا مزید کہنا تھا کہ چناب میں مرالہ سے لے کر پنجند تک پانی کا بہاؤ معمول کے مطابق ہے، پانی کا لیول اب کم ہو رہا ہے، بند توڑنا نہیں پڑا ہے،سب سے زیادہ علی پور، ملتان اور جلال پور میں لوگ سیلاب سے متاثر ہوئے ہیں۔