آئی فون 17 سیریز میں ایک نئے مسئلے کی نشاندہی

ایپل نے 9 ستمبر کو اپنی نئی آئی فون 17 سیریز کو متعارف کرایا تھا، جس کی فروخت 19 ستمبر سے شروع ہوئی۔

دنیا بھر میں آئی فون 17 کے مختلف ماڈلز کی خرید و فروخت جاری ہے، لیکن صارفین نے اس سیریز کے بارے میں ایک بڑی شکایت کی ہے۔

صارفین نے آئی فون 17 سیریز کو 'خراشوں کا مقناطیس' قرار دیا ہے۔

کئی صارفین نے بتایا کہ یہ نئے ماڈلز بہت آسانی سے خراشیں کھا جاتے ہیں۔

19 ستمبر کو فروخت شروع ہونے کے چند گھنٹوں کے اندر ہی سوشل میڈیا پر آئی فون 17 ایئر، 17 پرو، اور 17 پرو میکس کی ایسی تصاویر اور ویڈیوز سامنے آئیں جن میں خراشیں واضح تھیں۔

ٹوئٹر پر ایک صارف نے آئی فون 17 پرو میکس کے پچھلے حصے پر خراشیں دکھاتی ہوئی ویڈیو شیئر کی اور اسے "اسکریچ گیٹ" کا نام دیا۔

ایک اور صارف نے آئی فون 17 ایئر کی تصویر شیئر کرتے ہوئے اسے بھی "اسکریچ میگنیٹ" کہا۔

یوٹیوب پر ایک ویڈیو میں آئی فون 17 ماڈلز کو چاقو، اسکرو ڈرائیور، لائٹر، سکے اور چابیوں کے ذریعے جانچا گیا، جس میں دکھایا گیا کہ اورنج اور بلیو رنگ کے آئی فون 17 پرو ماڈلز خاص طور پر جلد خراش کھا جاتے ہیں۔

دلچسپ بات یہ ہے کہ ایپل نے 9 ستمبر کو آئی فون 17 پرو ماڈلز کی رونمائی کے دوران دعویٰ کیا تھا کہ ان کے بیک پر موجود سیرامک شیلڈ ڈیوائسز کو خراشوں سے تین گنا بہتر تحفظ فراہم کرتی ہے۔

اب تک ایپل کی جانب سے اس مسئلے پر کوئی سرکاری ردعمل سامنے نہیں آیا ہے۔