محسن نقوی کا بڑا اعلان: حارث رؤف پر آئی سی سی جرمانہ خود ادا کریں گے

پاکستان کرکٹ بورڈ (پی سی بی) کے چیئرمین محسن نقوی نے فاسٹ بولر حارث رؤف پر ایشیا کپ 2025 کے دوران بھارتی شائقین کو "0-6" کا اشارہ کرنے پر آئی سی سی کی جانب سے عائد کردہ جرمانہ خود ادا کرنے کا اعلان کیا ہے۔

واضح رہے کہ 21 ستمبر کو بھارت کے خلاف میچ میں پاکستانی بلے باز صاحبزادہ فرحان نے نصف سنچری مکمل کرنے کے بعد بلے کو گن کی شکل دے کر خوشی کا اظہار کیا، جب کہ حارث رؤف نے وکٹ حاصل کرنے کے بعد اور باؤنڈری کے قریب بھارتی تماشائیوں کی ہوٹنگ کا جواب دیتے ہوئے ہوائی جہاز کے گرنے کا اشارہ کیا۔

بھارتی میڈیا اور بورڈ کی جانب سے ان اشاروں پر اعتراض کرتے ہوئے دونوں پاکستانی کھلاڑیوں کے خلاف آئی سی سی میں شکایت درج کرائی گئی تھی۔

بعد ازاں میچ ریفری کے سامنے پیشی کے بعد آئی سی سی نے حارث رؤف کو ضابطہ اخلاق کی خلاف ورزی کا مرتکب قرار دے کر ان پر میچ فیس کا 30 فیصد جرمانہ عائد کیا، جبکہ صاحبزادہ فرحان کو وارننگ دے کر چھوڑ دیا گیا۔

ذرائع کے مطابق پی سی بی چیئرمین محسن نقوی نے یہ مؤقف اپنایا کہ حارث نے قوم کی نمائندگی کی اور شائقین کا جواب ایک جذبے کے تحت دیا، اس لیے وہ اس جرمانے کی ادائیگی خود کریں گے۔ یاد رہے کہ اسی ایونٹ میں 14 ستمبر کو بھارت کے کپتان سوریا کمار یادیو پر بھی پریزینٹیشن کے دوران متنازع بیان دینے پر آئی سی سی نے میچ فیس کا 30 فیصد جرمانہ عائد کیا تھا۔