معروف چینی کمپنی کا پشاور میں ہر سال 80 ہزار گدھے پالنے کا فیصلہ

پشاور:پاک چین اقتصادی تعاون کے تحت ایک منفرد منصوبہ تیزی سے عملی شکل اختیار کر رہا ہے جس میں چین کی معروف کمپنی "سنگ یِنگ” پشاور میں گدھوں کی افزائش کے لیے 3 کروڑ 70 لاکھ ڈالر کی سرمایہ کاری کرے گی۔ 

تفصیلات کے مطابق اس منصوبے کے تحت 40 جدید فارم اور ایک سائنسی لیبارٹری قائم کی جائے گی جہاں سالانہ 80 ہزار گدھوں کی افزائش ممکن ہوگی۔

اس حوالے سےوفاقی وزارت فوڈ سیکیورٹی کے ذرائع کے ذرائع کا کہنا ہے کہ منصوبے کے ابتدائی تین سے پانچ سال گدھوں کی افزائش نسل پر توجہ دی جائے گی، جس کے بعد ہر ماہ تقریباً 10 ہزار گدھوں کو پروسیس کرکے چین کو گوشت اور ہڈیاں برآمد کی جائیں گی۔

ذرائع کا کہنا ہے کہ اس مقصد کے لیے زرعی یونیورسٹی پشاور میں ایک جدید ڈونکی بریڈنگ لیبارٹری بھی قائم کی جارہی ہے، جو سائنسی بنیادوں پر افزائش کو عالمی معیار سے ہم آہنگ کرے گی۔

ماہرین کے مطابق اس منصوبے کو پاکستان کی لائیو اسٹاک انڈسٹری میں ایک نئی جہت قرار دیا جا رہا ہے، جس سے نہ صرف روزگار کے مواقع پیدا ہوں گے بلکہ پاکستان عالمی سپلائی چین کا حصہ بھی بن سکے گا۔

ماہرین کا مزید کہنا ہے کہ چین میں گدھے کے گوشت اور ہڈیوں کی طلب تیزی سے بڑھ رہی ہے، جس کے پیش نظر یہ منصوبہ دونوں ممالک کے درمیان تجارتی تعاون کو مزید وسعت دینے کا باعث بنے گا۔

وزارت کے ایک اہلکار نے بتایا کہ اگر یہ منصوبہ کامیاب رہا تو مستقبل میں پاکستان اس انوکھے شعبے میں ایک بڑی برآمدی منڈی کی حیثیت اختیار کرسکتا ہے۔

دوسری جانب وزارت فوڈ سیکیورٹی کا کہنا ہے کہ گدھے کا گوشت اور ہڈیاں صرف چین کو برآمد کی جائیں گی جبکہ مقامی مارکیٹ میں فروخت پر مکمل پابندی برقرار رہے گی۔