سینیٹ الیکشن : یوسف رضا گیلانی پی ڈی ایم کےمشترکہ امیدوار قرار

 تفصیلات کے مطابق  مسلم لیگ ن ترجمان مریم اورنگزیب کاکہنا ہے کہ  یوسف رضا گیلانی آج الیکشن کمیشن میں کاغذات نامزدگی جمع کرائیں گے، یوسف رضا گیلانی کےہمراہ  رہنما مسلم لیگ ن اور سابق وزیراعظم  شاہدخاقان عباسی  اور رہنما  پیپلز پارٹی و سابق وزیراعظم    پرویزاشرف ہوں گے۔راجہ پرویز اشرف، سابق وزیراعظم یوسف رضا گیلانی کے سینیٹ میں کاغذات نامزدگی کے تجویز کنندہ ہیں جبکہ شاہد خاقان عباسی یوسف رضا گیلانی کے سینیٹ میں کاغذات نامزدگی کے تائید کنندہ ہیں ۔  خیال رہے پیپلزپارٹی نےیوسف رضاگیلانی کواسلام آباد سےسینیٹ امیدوار نامزد کیا تھا۔

اس سے قبل الیکشن کمیشن نے  سابق وزیراعظم  یوسف رضا گیلانی کا ووٹ ٹرانسفر کرنے کی درخواست  بھی منظور کرلی ہے ۔جس کے بعد وہ  اسلام آباد سے سینیٹ الیکشن لڑنے کے اہل ہوگئے  ہیں ۔ سابق وزیراعظم کا ووٹ اسلام آباد کے سیکٹر ایف 8 کے پتہ  پر درج کرلیا گیا۔ انہوں  نے ایک دن پہلے ووٹ ٹرانسفر کرنے کی درخواست کی تھی۔

دوسری جانب سینیٹ الیکشن کیلئے  کاغذات نامزدگی جمع کرانے کی آخری تاریخ15فروری مقرر  کر دی گئی  ہے  ۔ الیکشن کمیشن کی جانب سے واضح کیا گیا ہے کہ پولنگ 3 مارچ کو ہی ہوگی، امیدواروں سہولیت کیلئے شیڈول میں تبدیلی کی گئی ہے۔ کاغذات جمع کرنے والوں کے نام 16فروری کوشائع کئے جائیں گے ۔    الیکشن کمیشن کے مطابق امیدواروں کی حتمی فہرست 24 فروری کو جاری ہوگی، امیدوار اپنے کاغذات نامزدگی 25 فروری تک واپس لے سکیں گے۔