ٹرمپ کو نوبیل انعام نہ ملا، وائٹ ہاؤس کا نوبیل کمیٹی پر سیاست کا الزام

واشنگٹن: امریکی صدر ڈونلڈ ٹرمپ کو نوبیل امن انعام نہ دیے جانے پر وائٹ ہاؤس کی جانب سے ردعمل سامنے آیا ہے۔

وائٹ ہاؤس کے ترجمان اسٹیون چیونگ نے اپنے بیان میں کہا کہ “نوبیل کمیٹی نے ایک بار پھر ثابت کیا ہے کہ وہ سیاست کو امن پر فوقیت دیتی ہے۔”

انہوں نے کہا کہ"صدر ٹرمپ اپنی کوششیں جاری رکھیں گے، وہ جنگوں کا خاتمہ کرتے رہیں گے اور قیمتی جانیں بچانے کے لیے کوشاں رہیں گے۔"

یاد رہے کہ 2025 کا نوبیل امن انعام وینزویلا کی جمہوریت پسند رہنما ماریا کورینا مچاڈو کو دیا گیا ہے۔

ناروے کی نوبیل کمیٹی کے مطابق، ماریا کورینا کو یہ انعام جمہوریت کی بحالی، عوام کے حقوق کے دفاع اور آمریت سے پُرامن انتقالِ اقتدار کی جدوجہد پر دیا گیا۔

واضح رہے کہ نوبیل امن انعام ان شخصیات کو دیا جاتا ہے جو بین الاقوامی ہم آہنگی، فوجی تناؤ کے خاتمے اور امن کے فروغ میں نمایاں کردار ادا کریں۔

صدر ٹرمپ ماضی میں کئی بار نوبیل انعام حاصل کرنے کی خواہش کا اظہار کر چکے ہیں۔ ان کا دعویٰ رہا ہے کہ وہ 7 بین الاقوامی تنازعات کو ختم کروا چکے ہیں، اور ان کی کوششیں عالمی امن کے لیے اہم ہیں۔

2023 میں پاکستان نے بھی اس موقف کی تائید کرتے ہوئے ٹرمپ کو نوبیل انعام کا مستحق قرار دیا تھا۔ بعد ازاں، اسرائیل، کمبوڈیا، آرمینیا اور آذربائیجان نے بھی امریکی صدر کی حمایت کی تھی۔

تاہم، بین الاقوامی حمایت کے باوجود، ٹرمپ کو نوبیل انعام نہ مل سکا اور ان کا خواب ادھورا رہ گیا۔