راشد خان نے ون ڈے کرکٹ میں وسیم اکرم اور ثقلین مشتاق کا ریکارڈ برابر کر دیا

ڈھاکہ :افغانستان کےنامور کرکٹر راشد خان نے بنگلہ دیش کیخلاف میچ میں ایک اور اہم اعزاز اپنے نام کر لیا۔

تفصیلات کے مطابق بنگلہ دیش کے خلاف دوسرے ون ڈے میں 5 وکٹیں حاصل کرکےراشد خان نے پاکستان کے سابق کپتان وسیم اکرم اور اسپنر ثقلین مشتاق کا ریکارڈ برابر کر دیا۔

راشد خان نے کیریئر میں چھٹی بار ون ڈے انٹرنیشنل میں 5 یا پانچ سے زائد وکٹیں حاصل کیں ، ان سے قبل سوئنگ کے سلطان وسیم اکرم اور آف اسپنر ثقلین مشتاق پاکستان کی جانب سے ون ڈے کرکٹ میں 6،6 بار یہ کارنامہ انجام دے چکے ہیں۔

راشد خان کے علاوہ اس فہرست میں بھارت کے محمد شامی ، نیوزی لیند کے ٹرینٹ بولٹ اور جنوبی افریقہ کے لانس کلوسنر بھی 6،6 بار یہ کارنامہ سرانجام دے چکے ہیں۔

خیال رہے کہ ون ڈے کرکٹ میں سب سے زیادہ پانچ وکٹیں لینے کا عالمی ریکارڈ پاکستان کے وقار یونس کے پاس ہے جنہوں نے 13 بار یہ کارنامہ انجام دے رکھا ہے،جبکہ دوسرے نمبر پر سری لنکن اسپنر مرلی دھرن نے 10 بار جبکہ مچل اسٹارک، بریٹ لی اور شاہد آفریدی 9، 9 بار پانچ وکٹیں لے رکھی ہیں۔