مقبوضہ مغربی کنارہ اسرائیل میں ضم نہیں ہوگا، ٹرمپ کا اعلان

امریکی صدر ڈونلڈ ٹرمپ نے ایک امریکی جریدے کو انٹرویو دیتے ہوئے کہا ہے کہ مقبوضہ مغربی کنارہ اسرائیل میں ضم نہیں ہوگا، کیونکہ انہوں نے عرب ممالک سے وعدہ کیا تھا اور اب اس وعدے سے پیچھے نہیں ہٹ سکتے۔

صدر ٹرمپ نے مزید کہا کہ امریکا کو عرب ممالک کی زبردست حمایت حاصل ہے، اور اگر اسرائیل نے مغربی کنارہ ضم کیا تو وہ امریکا کی حمایت سے محروم ہوسکتا ہے۔

یہ بیان ایک ایسے وقت میں سامنے آیا ہے جب گزشتہ روز اسرائیلی پارلیمنٹ نے مقبوضہ مغربی کنارے کو اسرائیل میں شامل کرنے کا غیر قانونی بل منظور کیا تھا۔

ٹرمپ نے انٹرویو میں کہا کہ انہوں نے اسرائیلی وزیراعظم نیتن یاہو کو غزہ پر مزید حملوں سے روکا، اور انہیں باور کرایا کہ "دنیا اسرائیل کے خلاف ہے، جبکہ اسرائیل ایک چھوٹا ملک ہے جو عالمی مخالفت برداشت نہیں کرسکتا۔"

امریکی صدر نے مزید کہا کہ قطر پر اسرائیلی حملہ غلط حکمتِ عملی تھی، جس کے باعث اسرائیل پر جنگ بندی کے لیے دباؤ بڑھا۔ ان کے مطابق، امیرِ قطر کو بتایا گیا کہ یہ واقعہ ان عوامل میں سے ایک تھا جس نے سب کو مذاکرات کی میز پر لانے میں مدد دی۔

ٹرمپ نے کہا کہ وہ مستقبل میں غزہ کی پٹی کا دورہ کرنے کا ارادہ رکھتے ہیں، اور ان کا خیال ہے کہ سعودی عرب سال کے آخر تک ابراہیمی معاہدے میں شامل ہوسکتا ہے۔

انہوں نے یہ بھی انکشاف کیا کہ وہ سوچ رہے ہیں کہ آیا فلسطینی رہنما مروان برغوثی کی رہائی کے لیے اسرائیل پر دباؤ ڈالیں یا نہیں۔

مروان برغوثی، فتح موومنٹ کے سینئر رہنما اور فلسطین کے مقبول سیاسی لیڈر ہیں جو 2003 سے اسرائیلی قید میں ہیں۔ 22 برس بعد بھی ان کی مقبولیت برقرار ہے، خاص طور پر مغربی کنارے اور غزہ میں۔

اطلاعات کے مطابق، غزہ جنگ بندی ڈیل کے دوران حماس کی جانب سے قیدیوں کی فہرست میں مروان برغوثی کا نام بھی شامل کیا گیا تھا، تاہم اسرائیلی حکام نے انہیں فہرست سے خارج کردیا۔