صوبائی حکومت نے دفعہ 144 کے نفاذ میں ایک دفعہ پھر توسیع کر دی

لاہور: صوبائی محکمہ داخلہ پنجاب نےصوبےبھرمیں دفعہ144کےنفاذمیں 8دن کی توسیع کردی۔

اس حوالے سے صوبائی محکمہ داخلہ نے ہفتہ یکم نومبر تک دفعہ 144 کے نفاذ میں توسیع کا نوٹیفکیشن جاری کر دیا، عوامی آگاہی کیلئے دفعہ 144 کے نفاذ کی بڑے پیمانے پر تشہیر کی ہدایت کردی گئی۔

جاری کر دہ نوٹیفکیشن کے مطابق پنجاب میں احتجاج،جلسے،جلوس،ریلیوں،دھرنوں،اجتماع پردفعہ 144کےتحت پابندی عائد ہوگی،پنجاب بھر میں ہرقسم کے اسلحےکی نمائش پر بھی مکمل پابندی ہو گی،دفعہ 144کے تحت لاؤڈ اسپیکر کے غیرقانونی استعمال پربھی مکمل پابندی ہے۔

پنجاب میں اشتعال انگیز، نفرت آمیز یافرقہ وارانہ موادکی اشاعت وتقسیم پرمکمل پابندی ہے، دفعہ 144 کے نفاذمیں توسیع کافیصلہ امن وامان کےقیام،انسانی جانوں کےتحفظ کیلئےکیاگیا،کابینہ کمیٹی بامن وامان کےاجلاس میں دفعہ144کےنفاذمیں توسیع کی سفارش کی گئی۔

محکمہ داخلہ کے مطابق پابندی کا اطلاق شادی کی تقریبات، جنازہ اور تدفین پر نہیں ہوگا، سرکاری فرائض کی انجام دہی پر موجود افسران و اہلکار اور عدالتیں پابندی سے مستثنیٰ ہیں، لاؤڈ اسپیکر صرف اذان اور جمعہ کے خطبہ کیلئے استعمال کیے جا سکتے ہیں۔

سیکیورٹی خطرات کے پیش نظر عوامی جلوس و دھرنا دہشت گردوں کیلئے سافٹ ٹارگٹ ہو سکتا ہے، شرپسند عناصر عوامی احتجاج کا فائدہ اٹھا کر اپنے مذموم عزائم کی تکمیل کیلئے ریاست مخالف سرگرمیاں کر سکتے ہیں۔