تیسری چیف آف آرمی اسٹاف نیشنل انٹر کلب ہاکی چیمپین شپ 2026 کےشیڈول کا اعلان ہو گیا

لاہور: پاکستان ہاکی فیڈریشن (پی ایچ ایف) کے سیکرٹری جنرل رانا مجاہد نے نیشنل ہاکی اسٹیڈیم لاہور میں پریس کانفرنس سے خطاب کرتے ہوئے "تیسری چیف آف آرمی اسٹاف نیشنل انٹر کلب ہاکی چمپئن شپ"کے شیڈول کا باقاعدہ اعلان کر دیا ہے۔

جاری کر دہ شیڈول  کے مطابق یہ ٹورنامنٹ 4جنوری سے شروع ہو کر 28فروری 2026تک جاری رہے گا۔

اس موقع پر پی ایچ ایف کی قیادت اور نامور کھلاڑیوں نے فیلڈ مارشل جنرل سید عاصم منیر کی جانب سے قومی کھیل کی غیر معمولی سرپرستی پر ان کا تہہ دل سے شکریہ ادا کیا۔

جاری کر دہ شیڈول کے تحت  ٹورنامنٹ چار مرحلے میں کھیلا جائے گا،پہلا مرحلہ 4 سے 24 جنوری تک ضلعی سطح کے کلبوں کے درمیان کھیلا جائے گا، جس میں مقامی ٹیلنٹ کو اپنی صلاحیتیں دکھانے کا بھرپور موقع ملے گا۔

دوسرا مرحلہ ڈویژن اور تیسرے مرحلے میں صوبائی لیول پر مقابلے ہوں گےقومی سطح پر آخری مرحلہ 17 فروری سے 28 فروری تک جاری رہے گا۔

  ٹورنامنٹ کے دوران پی ایچ ایف ملک بھر میں ہاکی کلبوں کی سکروٹنی اور رجسٹریشن کا عمل بھی مکمل کرے گی، جبکہ نوجوانوں کی حوصلہ افزائی کے لیے خطیر انعامی رقم اور مراعات بھی دی جائیں گی۔

پریس کانفرنس کے دوران  رانا مجاہد نے کہا کہ پاک فوج کی براہ راست شمولیت سے پاکستان میں ہاکی کی ساکھ اور وقار تیزی سے بحال ہو رہا ہے۔

انہوں نے واضح کیا کہ فوج کی جانب سے اٹھائے گئے یہ اقدامات وقت کی اہم ضرورت تھے تاکہ دم توڑتے ہوئے قومی کھیل میں ایک نئی روح پھونکی جا سکے اور کھلاڑیوں میں نظم و ضبط اور امید پیدا کی جا سکے۔

ان کا مزید کہنا تھا کہ اس قبل بھی دو مرتبہ نچلے سطح پر پاکستان آرمی کے تعاون سے اس ٹورنامنٹ کا انعقاد کر چکے ہیں پچھلے ٹورنامنٹ کامیاب رہے ہیں، امید ہے یہ ٹورنامنٹ بھی کامیاب ہوگا۔