خیبرپختونخوا حکومت نے عشرہ محرم کیلئے کورونا ایس او پیز جاری کردیئے

تفصیلات کے مطابق  خیبرپختونخوا میں محرام الحرام سے متعلق قواعد و ضوابط طے   ہوگئے، نوٹیفکیشن جاری کردیے گئے ہیں۔محکمہ داخلہ کا کہنا ہے کہ  کراچی کے بعد خیبرپختونخوا میں بھی انڈین ڈیلٹا ویرینٹ کے پھیلاﺅکا خدشہ ہے، محرم کے مجالس اور جلوس میں کورونا ایس او پیز اور ذاکرین کےلئے ویکسی نیشن لازمی قرار دیدی گئی۔

نوٹیفکیشن میں کہا گیا ہے کہ  مجالس اور جلوس طے شدہ اور روایتی مقامات پر ہی منعقد کرائے جائیں۔مجالس اور جلوسوں میں بزرگ شہریوں اور بچوں کی تعداد کم سے کم رکھی جائے، نزلہ، زکام اور بخار میں مبتلا افراد کی مجالس اور جلوسوں میں شرکت پر پابندی ہوگی۔

محکمہ داخلہ کی جانب سے جاری نوٹیفکیشن میں کہا گیا ہے کہ   مجالس کے انعقاد کےلئے جگہ مناسب اور کشادہ ہونی چاہیے، امام بارگاہوں میں 6 فٹ فاصلہ برقرار رکھنے کیلئے نشانات لگائے جائیں گے،داخلی راستے پر تمام افراد کی تھرمل اسکریننگ، ماسک اور سینی ٹائزرز کی دستیابی یقینی بنائی جائے ۔

نوٹیفکیشن کے مطابق امام برگاہوں میں مجالس سے پہلے اور بعد میں کلورین سے فرش کی صفائی لازمی بنائے، نیاز کی تقسیم کے مقامات پر زیادہ بھیڑ نہ ہو، مصافحہ اور گلے ملنے سے پرہیز کیا جائے۔