معروف براڈ کاسٹر اور کالم نگار عظیم سرور انتقال کر گئے

تفصیلات کے مطابق  مرحوم  عظیم سرور کی عمر 78 برس  تھی، وہ گردوں کے امراض میں مبتلا تھے  اور گزشتہ روز نجی اسپتال میں خالق حقیقی سے جاملے ۔ عظیم سرورکی نماز جنازہ آج  بعد نماز ظہر مسجد نورگلشن اقبال بلاک 16 میں ادا کی جائےگی۔

عظیم سرور نے 16 سال کی عمر میں بطور اناؤنسر ریڈیو پاکستان میں خدمات کا آغاز کیا ، 44 سالہ کیریئر میں عظیم سرور نے پروڈیوسر، پروگرام مینیجر، ڈپٹی کنٹرولر، میزبان  اور  کمنٹیٹر کے فرائض انجام دیے۔ عظیم سرور نے ریڈیو پاکستان کے لیے صبح پاکستان ، آواز خزانہ ، رنگ ہی رنگ جیدی کے سنگ اور جیدی کے مہمان جیسے معروف پروگرام ترتیب دیے۔

عظیم سرور نے ریڈیو اور ٹیلی ویژن کے لیےکئی معروف ڈرامے بھی تحریرکیے، ان کے تحریر کردہ مشہور ڈراموں میں آواز کے سائے، خواب آزاد ہیں ، برف اور ہونٹوں کے سراب شامل ہیں ،  1974 میں لاہور میں ہونے والی تاریخی اسلامی سربراہی کانفرنس میں کمنٹیٹر کے فرائض  انجام دینے کا اعزاز بھی انہیں حاصل ہے ۔عظیم  سرور نے اخبارات میں کالم نگاری بھی کی۔