جھنگ : مبینہ پولیس مقابلے کے دوران 3 ڈاکو ہلاک

جھنگ: صوبہ پنجاب  کے ضلع جھنگ میں  مبینہ پولیس مقابلے میں تین ڈاکو ہلاک ہوگئے ۔

پولیس کے مطابق دو موٹر سائیکلوں پر سوار 6 ملزمان نے کوٹ خیرا کے قریب پولیس پر فائرنگ کی ، پولیس کی جوابی فائرنگ پر ملزمان کماد کی فصل میں چھپ  گئے  ۔ پولیس کا کہنا ہے کہ  فائرنگ کے نتیجہ میں دو ڈاکو ہلاک جبکہ ایک شدید زخمی ہو گیا، زخمی ڈاکو ہسپتال میں زخموں کی تاب نہ لاتے ہوئے دم توڑ گیا ۔ پولیس کے مطابق  ہلاک  ڈاکوؤں   میں الطاف حسین ،غلام محی الدین اور سلیم عرف چھوٹو شامل ہیں۔ ملزمان کے قبضہ سے دو پسٹل،ایک رائفل،پانچ موبائل فون اور دو موٹر سائیکل برآمد ہوئے۔ جھنگ پولیس کے مطابق  تین ملزمان فرار ہونے میں کامیاب ہو گئے جن کی تلاش کیلئے چھاپے مارے جارہے  ہیں ۔

ہلاک ہونے والے ڈاکوؤں پر چوری اور ڈکیتی کے مجموعی طور پر 32 مقدمات درج تھے۔