پاکستان نیوزی لینڈ کرکٹ ون ڈے سیریز:پہلا میچ آج کھیلا جائے گا

تفصیلات کے مطابق پاکستان اورنیوزی لینڈ کے درمیان تین ایک روزہ بین الاقوامی کرکٹ میچوں کی سیریز کا پہلا میچ آج راولپنڈی میں کھیلاجائے گا۔ ڈے اینڈ نائٹ میچ دوپہر ڈھائی بجے شروع ہوگا جبکہ دو بجے ٹاس ہوگا ۔ کورونا کے باعث اسٹیڈیم کی گنجائش کے 25 فیصد یعنی چار ہزار پانچ سو شائقین اسٹیڈیم میں میچ دیکھ سکیں گے۔

پی سی بی کی جانب سے شائقین کو ٹکٹوں کے ہمراہ اپنے ویکسینیشن سرٹیفکیٹ لازمی لانے کی ہدایت کی گئی ہے ۔ اسٹیڈیم کے اطراف میں سیکیورٹی کے سخت انتظامات کیے گئے ہیں اورجڑواں شہروں میں میٹرو بس سروس فیض آباد، رحمان آباد اور شمسہ باد اسٹیشن بند رہیں گے۔ 

بارہ رکنی پاکستانی اسکواڈ میں بابراعظم (کپتان)، شاداب خان (نائب کپتان)، فخر زمان، حارث رؤف، حسن علی، افتخار احمد، امام الحق، محمد رضوان (وکٹ کیپر)، سعود شکیل، شاہین شاہ آفریدی، عثمان قادر اور زاہد محمود شامل ہیں ۔

نیوزی لینڈ کرکٹ اسکواڈ میں ٹام لیتھم (کپتان) (وکٹ کیپر)، فن ایلن، ہمیش بینیٹ، ٹام بلینڈل (وکٹ کیپر)، ڈگ بریسوسیل، کولن ڈی گرینڈہوم، جیکب ڈفی، میٹ ہنری، اسکاٹ کگلیجن، کول مکانچی، ہنری نکلس، آعجز پٹیل، رچن رویندرا، بلیر ٹکنر اور ول ینگ شامل ہیں ۔ 

گزشتہ روز پاکستان کرکٹ بورڈ نے قومی کرکٹ ٹیم کی ون ڈے کٹ کی رونمائی کردی  جو قومی ٹیم نیوزی لینڈ کے خلاف ہوم سیریز میں زیب تن کرے گی۔

واضح رہے کہ پاکستان اور نیوزی لینڈ کے مابین  تین ون ڈے اور پانچ ٹی20 میچوں پر مشتمل سیریز کھیلی جائے گی۔ دونوں ٹیموں کے درمیان تمام ایک روزہ میچز راولپنڈی کرکٹ اسٹیڈیم میں 17، 19 اور 21 ستمبر کو کھیلے جائیں گے جبکہ تمام ٹی ٹوئنٹی میچز قذافی اسٹیڈیم لاہور میں 25 ستمبر سے 3 اکتوبر کے درمیان شیڈول ہیں ۔

نیوزی لینڈ کی ٹیم آئندہ سال دو ٹیسٹ اور تین ون ڈے میچوں کی سیریز کھیلنے کے لیے دوبارہ پاکستان کا دورہ کرے گی

خیال رہے کہ۔نیوزی لینڈ کی ٹیم اٹھارہ سال بعد پہلی بار پاکستان میں کھیل رہی ہے۔ نیوزی لینڈ نے 2003 میں پاکستان کا آخری دورہ کیا تھا جس میں 5 ایک روزہ میچز کھیلے گئے تھے۔