ملک کے مختلف شہروں میں ٹریفک حادثات ، 6 افراد جاں بحق متعدد زخمی

تفصیلات کے مطابق  صوبائی دارالحکومت کراچی    میں خوفناک ٹریفک حادثہ یونیورسٹی روڈ شیخ زید کے قریب  پیش آیا جہاں  تیز رفتار کار موٹر سائیکل سوار کو بچاتے ہوئے پیڈسٹرین برج سے ٹکرا کر اُلٹ گئی۔حا دثے کے نتیجے میں کار میں سوار 4  افراد موقع پر  ہی دم توڑ گئے۔ حادثے کی اطلاع ملتے ہی ریسکیو اور پولیس موقع پر پہنچ گئیں  ۔   پولیس کے مطابق  جاں بحق  تمام افراد کی شناخت کر لی گئی ہے جن  میں محمد اسد ،تیمور ،روحان اور رمیز شامل ہیں۔ حادثے میں جاں بحق  ہونیوالے افراد کے اہل خانہ کے مطابق  چاروں  نوجوان  آپس میں دوست تھے  جو اکٹھے کھاناکھانے گلستان جوہر جا رہے تھے۔ پولیس کے مطابق حادثہ تیز رفتاری کے باعث پیش آیا ۔

پنجاب کے ضلع خانیوال  میں  بھی خوفناک ٹریفک  حادثہ  ،  ملتان روڈ پر  کار اور منی ٹرک میں تصادم  کے نتیجے میں 2 افراد جان کی بازی ہار گئے جبکہ   3افراد کے زخمی ہونے کی اطلاعات  ہیں ۔زخمیوں کو طبی امداد کیلئے ہسپتال منتقل کردیا گیا ہےجبکہ لاشوں کی شناخت کی جارہی ہے ۔

 بلوچستان کے  ضلع لسبیلہ میں   درگاہ سسی پنوں جانے والے زائرین کی گاڑی کو حادثہ پیش آیا ،  درگاہ  سے واپس آتے ہوئے کچے کے راستے ڈرائیور سے بے قابو ہوکر اُلٹ گئی  جس کے نتیجے میں 16  زائرین زخمی ہوگئے ، زخمیوں میں  خواتین اور بچے بھی  شامل ہیں ۔  ایدھی زرائع کے مطابق  تمام زخمیوں کو جام غلام قادر ہسپتال منتقل کیا جارہا ہے ۔

واضح رہے کہ عالمی ادارہ صحت کے مطابق پاکستان میں سالانہ 35 ہزار لوگ سڑک حادثات  میں جاں بحق ہوجاتے ہیں، جبکہ 50 ہزار سے زائد افراد زخمی اور عمر بھر کی معذوری سے دوچار ہوتے ہیں۔ حکومتی رپورٹ کے مطابق پاکستان میں ہر پانچ منٹ کے بعد ٹریفک حادثہ پیش آتا ہے، جس میں کوئی نہ کوئی شخص زخمی یا جاں بحق ہوجاتا ہے۔