ممتاز شاعر، دانشور ڈاکٹر اجمل نیازی انتقال کر گئے

ڈاکٹر اجمل نیازی کی عمر  75برس تھی اور ان کا تعلق میانوالی سے تھا۔ ڈاکٹر اجمل نیازی  کچھ عرصہ سے علیل تھے۔ ان  کی  نماز جنازہ شام ساڑھے چار بجے وحدت کالونی لاہور میں ادا کی جائے گی۔

 دانشور، شاعر،  ماہر تعلیم  و کالم نگار اجمل نیازی 16 ستمبر 1946 میں موسیٰ خیل میانوالی میں پیدا ہوئے، گورڈن کالج راولپنڈی، گورنمنٹ کالج میانوالی، گورنمنٹ کالج لاہور اور ایف سی کالج میں لیکچرر رہے۔

ڈاکٹر اجمل نیازی روزنامہ نوائے وقت میں ’بے نیازیاں ‘ کے عنوان سے کالم لکھتے رہے ہیں۔ انہوں نے 45 سال ادب کی خدمت میں گُزارے، انہوں  نے اردو اور پنجابی زبان میں شاعری کی ۔ اجمل نیازی کی تصنیفات میں جل تھل ،محمد الدین فوق ، بے نیازیاں ، مندر میں محراب اور سوانح حمید نظامی شامل ہیں۔

ڈاکٹر اجمل نیازی کو ان کی خدمات کے صلے میں حکومتِ پاکستان  کی جانب سے ستارۂ امتیاز سے بھی نوازا گیا۔