افغانستان نے پاکستان کو جیتنے کیلئے 148 رنزکا ٹارگٹ دے دیا

ٹی ٹوئنٹی ورلڈ کپ سپر 12 کے میچ میں افغانستان نے پاکستان کو جیتنے کیلئے 148 رنز کا ٹارگٹ دے دیا ہے، افغانستان نے 20 اوورز میں 6 وکٹوں پر 147 رنز سکور کیے، افغان کپتان محمد نبی اور گلبدین نائب کی شاندار بیٹنگ، مشکل وقت میں اکہتر رنز کی پارٹنر شپ بنائی۔

افغانستان کی  پاکستان کے خلاف پہلی وکٹ  7 رنز پر گری ،  حضرت اللہ بغیر رن بنائے آؤٹ ہوئے، محمد شہزاد 8 رنز،  اصغر افغان 10 رنز  نجیب اللہ 22 رنز بنا کر آؤٹ ہوئے۔

پاکستان کے عماد وسیم 2 وکٹیں لے کر نمایاں رہے،  شاہین آفریدی، حارث رؤف، شاداب خان اور حسن علی نے 1،1 وکٹ حاصل کی۔

افغانستان نے ٹاس جیت کر پہلے بیٹنگ کا فیصلہ کیا تھا۔

پاکستان اورافغانستان اب تک صرف ایک ٹی20  میچ میں آمنے سامنے آئے ہیں۔2013 میں شارجہ میں کھیلے جانے والے واحد میچ میں  قومی ٹیم فاتح ٹھہری۔ پاکستان نے دلچسپ میچ کے بعد افغانستان کو چھ وکٹوں سے شکست دی تھی۔

ورلڈ کپ 2019 میں دونوں ٹیموں کے درمیان سنسنی خیز میچ ہوا، جس میں پاکستان نے تین وکٹ سے فتح حاصل کی تھی۔