وفاقی دارالحکومت میں جان لیوا ڈینگی مچھر کے وار جاری

تفصیلات کے مطابق اسلام آباد میں ایک روز میں مزید 102 ڈینگی کیس سامنے آ گئے ہیں ، 24 گھنٹے کے دوران اسلام آباد میں قاتل مچھر ایک اور زندگی نگل گیا۔ ڈینگی میں مبتلا سیکٹر آئی الیون ون کا رہائشی مریض جاں بحق، ڈینگی سے جاں بحق مریض اسلام آباد کے نجی اسپتال میں زیرعلاج تھا۔

رواں سیزن کے دوران اسلام آباد میں ڈینگی سے 13 اموات ہو چکی ہیں۔24 گھنٹے میں رورل ایریا سے 57، اربن سے 45 ڈینگی کیس رپورٹ ہوئے ہیں ، رواں سیزن میں 3597 ڈینگی کیسز سامنے آ چکے ہیں،  رورل ایریا 2072، اربن 1525 ڈینگی کیسز سامنے آچکے ہیں۔

دوسری جانب  راولپنڈی میں ڈینگی کے مریضوں کی تعداد میں اضافہ ہوا ہے، ہسپتال میں زیر علاج ڈینگی مریضوں کے تعداد بھی بڑھ گئی ،ذرائع کے مطابق راولپنڈی میں  گزشتہ 24 گھنٹوں کے دوران مزید  72  شہری ڈینگی سے بیمار ہوگئے، ہسپتالوں میں داخل ڈینگی مریضوں کی  تعداد 102 سے زائد ہو گئی ہے۔

ذرائع کے مطا بق راولپنڈی میں کنٹونمنٹ بورڈ ایریا میں سب سے ذیادہ ڈینگی کیسز رپورٹ ہوئے ہیں ، مجموعی طور پر ڈینگی کیسز کی تعداد 2300 سے زائد ہوگئی۔