یواے ای میں 5 سے 11 سال تک کے بچوں کو فائزرویکسین لگانے کی منظوری

دنیا بھر میں کورونا کے کیسز ابھی بھی سامنے آرہے ہیں اور ویکسین لگانے کا عمل بھی ساتھ ساتھ جاری ہے ۔ عرب میڈیا کے مطابق متحدہ عرب امارات کی وزارت صحت نے پانچ سے گیارہ سال تک کی عمر کے بچوں کوہنگامی طور پر فائزر اور بائیو این ٹیک کی ویکسین لگانے کی منظوری دی ہے۔

اماراتی وزارت صحت کا کہنا ہےکہ بچوں کو ویکسین لگانے کی منظوری سخت کلینیکل ٹرائلز کے نتیجے کی بنیاد اور امریکی ایف ڈی اے کی منظوری کے بعد دی گئی ہے جس میں ویکسین کو بچوں کیلئے محفوظ قرار دیا گیا ہے۔ وزارت صحت کے مطابق ویکسین کے کلینیکل ٹرائلز کے نتیجے میں اس کے مثبت اور محفوظ نتائج سامنے آئے جس سے  پانچ سے گیارہ سال تک کے بچوں میں قوت مدافعت مضبوط ہوئی۔

وزار ت صحت نے اعلان کیا  ہے کہ دائمی امراض میں مبتلا ایسے افراد جنہوں نے فائزر، بائیو این ٹیک اور اسپوٹنگ ویکسین لی ہے انہیں ایک سپورٹ ڈوز بھی دی جائے گی جو 18 سے 49 سال تک کے افراد کو لگائی جائے گی۔

یاد رہے کہ حال ہی میں  ایک طبی تحقیق میں بتایا گیا ہے کہ فائزر/ بائیو این ٹیک کی تیار کردہ ایم آر این اے کووڈ ویکسین چھوٹے بچوں میں علامات والی بیماری سے بچانے کے لیے بہت زیادہ مؤثر ہے۔ تحقیق میں 5 سے 11 سال کے بچوں میں ویکسین محفوظ اور بیماری سے بچانے کے لیے 90.7 فیصد تک مؤثر ثابت ہوئی۔