پاکستان سپر لیگ سیزن 6 میں آج دو میچز کھیلے جائیں گے

تفصیلات کے مطابق نیشنل اسٹیڈیم کراچی میں  پی ایس ایل سیزن 6 میں آج کا پہلا میچ کراچی کنگز اور ملتان سلطانز کے درمیان  دن دو بجے ہو گا۔ کراچی کنگز عما د وسیم  کی قیادت  میں  میدان میں اترے گی ، کراچی کنگز کی ٹیم میں عامر یامین ، ارشد اقبال ، بابر اعظم ، کولن انگرام ، عماد وسیم ، محمد عامر ، شرجیل خان ، وقاص مقصود ، چاڈوک والٹن ، ڈین کرسچن ، دانش عزیز ، جو کلارک ، محمد نبی ، محمد الیاس ، نور احمد ، قاسم اکرم ، ذیشان ملک شامل ہیں ۔

ملتان سلطانز   کی ٹیم محمد رضوان کی کپتانی میں میدان میں اترے گی  کرس لین، جیمز وینس، صہیب مقصود، رلی روسو، خوشدل شاہ، شاہد آفریدی، کارلوس بریتھویٹ، سہیل تنویر، عثمان دار، شاہنواز دھنی شامل ہیں ۔ خیال رہے کہ پوائنٹس ٹیبل پر دونوں ٹیموں کے پوائنٹس برابر ہیں۔

پی ایس ایل کا آج دوسرا میچ پشاور زلمی اور اسلام آباد یونائیٹڈ کے درمیان شام 7 بجے شروع ہو گا۔ پوائنٹس ٹیبل پر پشاور زلمی اور اسلام آباد یونائیٹڈ 4، 4 پوائنٹس کے ساتھ برابر ہیں۔  اسلام آباد  یونائیٹڈ اسکواڈ میں کپتان شاداب خا ن ، ایلکس ہیلز ، فل سالٹ ، حسین طلعت ، آصف علی ، افتخار احمد ، لیوس گریگری ، فہیم اشرف ، ظفر گوہر ، حسن علی اور محمد وسیم شامل ہیں ۔ پشاور زلمی  وہاب ریاض کی کپتانی  میں میدان میں آئیں گی ، ٹیم میں کامران اکمل، امام الحق، حیدرعلی، شعیب ملک، ٹام کوہلرکیڈمور، شرفین روتھر فورڈ، مجیب الرحمٰن، ثاقب محمود، محمد عمران، محمد عرفان شامل ہیں ۔

گزشتہ روز بھی پی ایس ایل 6 کے دو میچز کھیلے گئے تھے۔ پہلا میچ ملتان سلطانز اور لاہور قلندرز کے درمیان کھیلا گیا جس میں ملتان سلطان نے لاہور قلندرز کو 7 وکٹوں سے شکست دے دی ۔ گزشتہ روز کا دوسرا میچ پشاور زلمی اور کوئٹہ گلیڈی ایٹرز کے درمیان کھیلا گیا جس میں پشاور زلمی نے فتح حاصل کی۔

واضح رہے کہ سپر لیگ میں چھ اسلام آباد یونائیٹڈ، دفاعی چیمپیئن کراچی کنگز، لاہور قلندرز، ملتان سلطانز، پشاور زلمی اور کوئٹہ گلیڈی ایٹرز کی ٹیمیں ٹائٹل کے لیے پنجہ آزمائی کریں گی۔  سپر لیگ سیزن 6 کا  یہ ایونٹ دو مرحلوں میں کھیلا جائےگا۔ 20 فروری سے 7 مارچ تک میچز کراچی میں ہونگے۔ دس مارچ سے دوسرا مرحلہ لاہور میں شروع ہوگا، جبکہ ایونٹ کا فائنل 22 مارچ کو قذافی اسٹیڈیم لاہور میں ہوگا۔کورونا وباء کے دوران تمام اسٹیک ہولڈرز کی صحت اور حفاظت کے پیش نظر 34 میچز پر مشتمل ایونٹ کراچی اور لاہور میں کروانے کا فیصلہ کیا گیا ہے.