افغان دارالحکومت کابل میں دودھماکے،1شخص جاں بحق

غیر ملکی خبر رساں ادارے کے مطابق طالبان حکام کا کہنا ہے کہ  افغان دارالحکومت کابل میں  دو دھماکوں میں کم از کم ایک شخص ہلاک اور تین خواتین سمیت کم از کم چھ زخمی ہوئے ہیں۔

وزارت داخلہ کے ترجمان قاری سعید خوستی نے ایک ٹویٹ میں کہا کہ مغربی کابل کے  علاقے دشت برچی میں ایک کار بم دھماکے میں ایک شہری ہلاک اور چھ زخمی ہوئے ہیں۔

غیر ملکی میڈیا کے مطابق ایک طالبان اہلکار نے نام ظاہر نہ کرنے کی شرط پر بتایا کہ سات افراد ہلاک اور نو زخمی ہوئے ہیں۔

مقامی رہائشیوں نے بتایا کہ  کارتے 3 کے علاقے میں ایک دوسرے دھماکے کی بھی اطلاع ملی۔ طالبان کے ایک اہلکار نے کہا کہ سیکورٹی فورسز ابھی بھی معلومات اکٹھی کر رہی ہیں۔اس حملے کی ذمہ داری کسی نے قبول نہیں کی ہے۔

دشتی برچی کے رہائشی محمد نبی نے کہا کہ ایسا لگتا ہے کہ دوسرے دھماکے میں بھی جانی نقصان ہوا ہے لیکن فوری طور پر کوئی تفصیلات نہیں ہیں۔