شعیب ملک کے بیٹے کی طبیعت  ناساز، آج کے میچ کیلئے دستیاب نہیں ہونگے

پاکستان کرکٹ بورڈ کی جانب سے ایک بیان میں تصدیق کی ہے کہ پاکستان ٹیم کے سینئر کھلاڑی  شعیب ملک بیٹے کی طبیعت خراب ہونے کے باعث  بنگلہ دیش کے خلاف تیسرے ٹی ٹوئنٹی میچ کے لیے دستیاب نہیں ہوں گے۔

 امکان ہے کہ افتخار احمد ان کی جگہ پلیئنگ الیون میں شامل ہوں گے۔

شعیب ملک مقامی وقت کے مطابق صبح دس بجے ڈھاکہ سے دبئی روانہ ہوجائیں گے جبکہ قومی ٹی ٹوئنٹی اسکواڈ کل شام ساڑھے چھ بجے ڈھاکہ سے بذریعہ دبئی وطن واپس روانہ ہوگا۔

اسپنرز عماد وسیم اور عثمان قادر کچھ روز دبئی میں اہلخانہ کے ہمراہ قیام کرنے کے بعد وطن واپس روانہ ہوں گے۔

علاوہ ازیں قومی ٹیسٹ اسکواڈ کل دوپہر 3 بجے ڈھاکہ سے چٹاگانگ روانہ ہوگا۔ باؤلنگ کنسلٹنٹ ویرنن فیلنڈر پہلے ٹیسٹ کے بعد اسکواڈ سے علیحدہ ہوجائیں گے۔ وہ یکم دسمبر کو جنوبی افریقہ روانہ ہوجائیں گے۔

واضح رہے کہ پاکستان اور بنگلہ دیش کے مابین پہلا ٹیسٹ میچ 26 نومبر سے چٹاگانگ میں کھیلا جائے گا جبکہ دوسرا اور آخری ٹیسٹ میچ 4 دسمبر سے ڈھاکہ میں کھیلا جائے گا۔