جرمنی میں  نئے کورونا کیسز کی ہفتہ وار اوسط کا نیا ریکارڈ 

 غیر ملکی خبررساں ادارے کے مطابق جرمنی میں کورونا کی صورتحال  تشویشناک حد تک  خراب ہوچکی ہے ، جرمنی کے وزیر صحت نے  کورونا وائرس کےکیسزمیں "ڈرامائی" اضافے پر قابو پانے کے لئے مزید پابندیوں کا مطالبہ  کیا ہے  ۔ جرمن وزیر صحت نے شہریوں کو متنبہ کیا ہے کہ"  موسم سرما کے اختتام تک انہیں یا تو کوویڈ ویکسین لگائی جائے گی، وہ ٹھیک ہو جائیں گے یا مر جائیں گے"۔  

وزیر صحت نے اپنے بیان میں  سردیوں میں انفیکشنز کی تعداد میں مزید اضافے کی پیشگوئی کردی ۔

کئی یورپی ممالک نے انفیکشن میں اضافے کے  باعث  پابندیاں عائد کر دی ہیں۔ ایک لاکھ آبادی میں کورونا کے نئے کیسز کی ہفتہ وار اوسط اب 400 تک پہنچ گئی  ہے۔

جرمنی کو اس وقت کورونا وائرس کی وبا کی چوتھی لہر کا سامنا ہے۔ پریشان کن بات یہ ہے کہ اس لہر کے دوران یومیہ بنیادوں پر اتنی زیادہ نئی انفیکشنز دیکھنے میں آ رہی ہیں، جتنی گزشتہ لہروں کے دوران دیکھنے میں نہیں آئی تھیں۔

جرمنی میں ویکسی نیشن  کا ریکارڈ 

یورپی یونین کے سب   سے زیادہ آبادی والے ملک  جرمنی  میں  سب سے کم آبادی نے کوویڈ کی ویکسی نیشن کروائی ہے ۔ اب تک صرف 67 فیصد جرمن باشندوں کی مکمل ویکسینیشن ہوئی ہے اور بہت سے شہری کورونا ویکسین لگوانے میں تاحال ہچکچاہٹ کا مظاہرہ کر رہے ہیں۔

رابرٹ کوچ انسٹی ٹیوٹ ہیلتھ ایجنسی کے مطابق جرمنی نے پیر کے روز مزید 30,643 کیسز کا اضافہ  ہوا ہے ، جس سے وبائی  مرض  کے آغاز سے لے کر اب تک مجموعی تعداد  5.3 ملین سے تجاوز کرگئی ہے ۔ 

ویکسینیشن لازمی کر دینے کی تجویز کی حمایت میں اضافہ

جرمنی میں نئی کورونا لہر کے دوران متاثرین اور شدید بیمار ہو جانے والے نئے مریضوں میں اکثریت ایسے شہریوں کی ہے، جنہوں نے ابھی تک ویکسین نہیں لگوائی ہے ۔ کئی ہسپتالوں نے تنبیہ کی ہے کہ آئندہ دنوں میں انہیں  ملک میں  مریضوں کی تعداد بہت زیادہ ہو جانے کے باعث غیر معمولی بوجھ کا سامنا کرنا پڑ سکتا ہے۔

یاد رہے ایک سال قبل کورونا وائرس سے پھیلنے والی بیماری کووڈ 19  کا علاج صرف اور صرف خود کو سب سے علیحدہ کر کے لاک ڈاؤن کی سخت پاسداری کر کے ہی ممکن تھا۔