بلدیاتی انتخابات بارے پنجاب حکومت کا اہم فیصلہ

ترجمان پنجاب حکومت کے مطابق  پنجاب میں  نچلی سطح پر بلدیاتی انتخابات غیر جماعتی بنیادوں پر ہوں گے ، اوپر کی سطح پر میئر اورضلع کونسل کے انتخابات  جماعتی بنیادوں پر براہ راست ہوں گے

۔ اس سے قبل پہلے نچلی سطح پر بھی جماعتی بنیادوں پرانتخابات کااعلان کیا گیا تھا ۔ 

ترجمان پنجاب حکومت کے مطابق نیبر ہڈ کونسل اور ویلیج کونسل کے انتخابات غیر جماعتی ہوں گے ، پنجاب کابینہ نے نچلی سطح پر غیر جماعتی بنیادوں پرانتخابات کی منظوری دی ہے ۔ 

ترجمان پنجاب حکومت حسان خاور کا کہنا ہے کہ  کے پی حکومت  نچلی سطح پر انتخابات بارے سپریم کورٹ اپیل میں  گئی ہے ، اگر عدالت جماعتی بنیادوں پرانتخابات کا حکم دے گی تو ہم بھی  اس پر عمل کریں گے ۔ ترجمان  کے مطابق  میئر اور چیئرمین ضلع کونسل کے انتخابات جماعتی بنیاد پر ،براہ راست ہوں گے، اوپر کی سطح پر جماعتی اورنچلی سطح پر غیر جماعتی انتخابات ہوں گے ۔

پنجاب میں پاکستان تحریک انصاف (پی ٹی آئی) کی زیرقیادت مخلوط حکومت نے برسراقتدار آنے کے فوراً بعد مئی 2019 میں پنجاب لوکل گورنمنٹ ایکٹ 2013 کے تحت بنائے گئے بلدیاتی اداروں کو تحلیل کر دیا تھا۔

پی ٹی آئی حکومت نے پی ایل جی اے 2019 کا اعلان کرکے پی ایل جی اے 2013 کو ختم کردیا تھا اور وزیراعلیٰ نے 4 مئی 2019 کو فوری طور پر ایل جی ایڈمنسٹریٹرز کا تقرر کیا تھا۔

منتظمین نے ان اختیارات کا استعمال 29 ماہ سے زیادہ جاری رکھا جس میں وہ 7 ماہ بھی شامل ہیں جب سپریم کورٹ نے 25 مارچ کو پی ایل جی اے 2019 کے سیکشن 3 کو آئین کے خلاف ایک مختصر حکم جاری کیا تھا۔

خیال رہے کہ حکومت آئندہ برس کی پہلی سہ ماہی میں صوبے میں بلدیاتی حکومت کے انتخابات کرائے گی۔ پنجاب میں مقامی حکومتوں کی 5 سالہ مدت 31 دسمبر کو ختم ہو رہی ہے۔