طوفان  یونائیس نے  برطانیہ میں تباہی مچادی 

طوفان یونائیس نے برطانیہ اور پورے یورپ کو اپنی لپیٹ میں لے لیا ،  لندن سمیت انگلینڈ کے مختلف علاقوں میں 4 افراد ہلاک ہوگئے۔ جنوبی انگلینڈ میں 196 کلومیٹر فی گھنٹہ کی رفتار سے آندھی چلی جس کی وجہ سے لوگ پیروں پہ نہ سنبھل سکے اور کئی افراد اُڑ کر دور جا گرے۔ 

گزشتہ روز لندن میں طوفان یونیس کے باعث ریڈ وارننگ جاری کرتے ہوئے لوگوں کو گھروں میں رہنے کی ہدایت کی گئی تھی ۔

برطانوی محکمہ موسمیات کی جانب سے ساؤتھ ویسٹ انگلینڈ اور ساؤتھ ویلز میں جمعہ کے روز خطرناک موسم کے سبب "ریڈ وارننگ"  جاری  کی گئی تھی ۔ 

یورپ میں مجموعی طور پر 9 سے زائد افراد اب تک طوفان سے ہلاک ہوچکے ہیں اور ہلاکتوں میں اضافے کا خدشہ ہے ۔

غیرملکی میڈیا کے مطابق آئرلینڈ میں 80 ہزار گھروں کی بجلی منقطع ہے جبکہ درجنوں پروازیں منسوخ اور ٹرین سروس بری طرح متاثر ہے،   برطانوی ایئر پورٹ حکام کا کہنا ہے کہ مسافر ایئر پورٹ آنے سے پہلے فلائٹ اسٹیٹس چیک کرلیں ۔ طوفان کے باعث شہریوں کو غیر ضروری سفر سے گریز کی ہدایت کی گئی ہے۔

نیدر لینڈز میں بھی  سمندری طوفان  کے باعث 3 افراد ہلاک ہوگئے ، ڈچ ایمرجنسی سروسز کا کہنا  ہے کہ  فٹ بال اسٹیڈیم سمیت کئی عمارتوں کی چھتیں اڑ گئیں ، ملک بھر سے 300 سے زائد پروازیں منسوخ کی گئی ہیں جبکہ  ٹرینیں اور پبلک ٹرانسپورٹ کا نظام بھی بند ہے۔ ایمرجنسی حالات کے باعث کئی علاقوں میں اسکول بند کر دیے گئے ہیں۔

حکام کے مطابق ملک میں 141 کلومیٹر فی گھنٹہ کی رفتار سے ہوائیں چلتی رہی ہیں ، طوفان کے باعث بیلجیم، ڈنمارک اور سوئیڈن میں طوفان کے پیش نظر وارننگ جاری کردی گئی۔

یاد  رہے کہ برطانیہ میں ایک  ہفتے میں یہ دوسرا طوفان ہے ،  پہلے طوفان ڈڈلی کے سبب ملک کے مختلف حصوں میں مسافروں کو شدید مشکلات ہیں اور ہزاروں گھر بجلی سے محروم ہیں ، طوفان کے باعث کمبریا، نارتھ یارکشائر اور لنکا شائر میں 14 ہزار گھر بجلی سے محروم ہوئے۔