ٹرانسفارمر دھماکے کا واقعہ : نیپرا نے حیسکو پرایک کروڑروپے جرمانہ عائد کردیا 

تفصیلات کے مطابق حیدرآباد کے علاقے اسلام آباد چوک پر ٹرانسفارمر پھٹنے سے 3 افراد ہلاک اور 4 زخمی ہو گئے تھے، نیپرا نے ہلاکتوں کی تحقیقات کے لیے 2 ممبران پر مشتمل کمیٹی بنا ئی  تھی۔

نیشنل الیکٹرک پاور ریگولیٹری اتھارٹی  (نیپرا)  اعلامیے کے مطابق تحقیقاتی ٹیم نے متاثرین کے بیانات قلم بند کیے، اور جائے وقوعہ سے شواہد بھی اکٹھے کیے، ٹیم نے حیسکو حکام سے بھی پوچھ گچھ کی، اور متاثرہ ٹرانسفارمر بنانے والی کمپنی کا بھی دورہ کیا۔

نیپرا اعلامیے میں کہا گیا ہے کہ تحقیقاتی ٹیم نے تفتیش مکمل کرنے کے بعد اتھارٹی کو رپورٹ پیش کی تھی ،  جس کے بعد اتھارٹی نے نیپرا ایکٹ کے تحت حیسکو کو شوکاز نوٹس جاری کیا اور سماعت کا موقع بھی دیا۔ اتھارٹی نے نیپرا ایکٹ کے تحت حیسکو کو شوکاز نوٹس جاری کیا۔

نیپرا اعلامیے کے مطابق حیسکوضابطہ اخلاق اور حفاظتی معیارات کو برقرار رکھنے کے لیے قانونی ذمے داریاں سرانجام دینے میں ناکام رہا۔ 

نیشنل الیکٹرک پاور ریگولیٹری اتھارٹی (نیپرا) نے حیسکو کو سوگوار خاندانوں کو 35 لاکھ روپے فی کس معاوضہ ادا کرنے کی ہدایت کردی ۔ 

اعلامیے کے مطابق معاوضے کی تفصیلات اتھارٹی کے ساتھ شیئر کرنے کی جائیں گی، اتھارٹی کے حکم پر حیسکو سوگوار خاندانوں کے ایک ایک فرد کو ملازمت بھی دے گی۔