شمالی وزیرستان : پولیو کے 12ویں کیس کی تصدیق

ترجمان وزارت صحت کے مطابق رواں سال پولیو کے رپورٹ ہونے والے تمام کیسز شمالی وزیرستان سے  ہیں ۔

 اس حوالے سے وزیر صحت عبدالقادر پٹیل نے کہا کہ خیبر پختونخوا کے جنوبی و شمالی اضلاع پولیو وائرس کے لیے حساس قرار دیئے جا چکے ہیں اور پولیو کے خاتمے کے لیے ہنگامی بنیاد پر اقدامات کیے جا رہے ہیں۔

وزیر صحت عبدالقادر پٹیل  نے کہا کہ پولیو کے خاتمے کیلئے مربوط اور موثر حکمت عملی ترتیب دی  ہے ،  وائرس کے ممکنہ پھیلاؤ کو  روکنے کیلئے متعدد بار پولیو مہمات کا انعقاد کر چکے ہیں ، موجودہ حکومت پولیو کے خاتمے تک چین سے نہیں بیٹھے گی۔ 

انہوں نے مزید کہا کہ پروگرام زیادہ سے زیادہ بچوں کو ویکسین کی فراہمی یقینی بنانے کے لئے متعدد حکمت عملی پر عمل پیرا ہے ، جس میں بڑی حد تک کامیابی حاصل ہوئی ہے ، ہمارے بچے صحت مند اور محفوظ مستقبل کے حقدار ہیں، تمام والدین کو حالات کی نزاکت کا احساس ہونا چاہئے۔ 

وزیر صحت نے اپیل کی کہ  وائرس کے خاتمے کو قومی فریضہ سمجھتے ہوئے تمام پاکستانی اپنا بھرپور کردار ادا کریں ۔ 

واضح رہے کہ  پولیو کے خاتمے کی عالمی مہم  1988 میں شروع ہوئی تھی  اور اب یہ بیماری دنیا سے خاتمے کے قریب ہے۔ بدقسمتی سے  پاکستان  اور افغانستان  دنیا کے وہ  دو ممالک  ہیں جہاں پولیو وائرس ابھی  تک ختم نہیں ہوسکا ہے ۔ اس سے قبل  25 اگست  کو ورلڈ ہیلتھ آرگنائزیشن (ڈبلیو ایچ او)    افریقہ کو پولیو سے پاک قرار دے چکی  ہے ۔