وزیر اعظم نے سوشل میڈیا قوانین کا جائزہ لینے کیلئے کمیٹی تشکیل دےدی

تفصیلات کے مطابق  سوشل میڈیا قوانین کے معاملے پر  اٹارنی جنرل نے سوشل میڈیا قوانین پر اپنی سفارشات وزیراعظم کو بھجوا دیں۔اٹارنی جنرل نے سفارشات میں کہا ہے کہ سوشل میڈیا رولز اور نگرانی کے لیے بڑے پیمانے پر مشاورت کی جائے،  سوشل میڈیا رولز میں بنیادی انسانی حقوق اور آزادی رائے کو ملحوظ خاطر رکھا جائے۔

وزیراعظم عمران خان نے اٹارنی جنرل کی سفارش پر پانچ رکنی کمیٹی تشکیل دے دی  ہے،ڈاکٹر شیری مزاری کی سربراہی میں کمیٹی تشکیل دی گئی، کمیٹی میں ملیکہ بخاری،سینٹر علی ظفر،سیکرٹری وزارت آئی ٹی شامل ہیں، جبکہ  چئیرمین پی ٹی اے بھی کمیٹی کا حصہ ہیں ۔کمیٹی تیس روز کے اندر اپنی سفارشات وزیراعظم کو دے گی۔

واضح رہے  کہ حکومت نے 27 نومبر 2020 کو 'ریموول اینڈ بلاکنگ اَن لا فل آن لائن کانٹینٹ (پروسیجر، اوور سائٹ اینڈ سیف گارڈز) رولز 2020 'کے عنوان سے قواعد نافذ کیے تھے لیکن ڈیجیٹل رائٹس ایکٹیوسٹ اور سوشل میڈیا پلیٹ فارمز خاص طور پر اے آئی سی کے اراکین نے اس کا خیرمقدم نہیں کیا تھا۔اے آئی سی کی جانب سے وزیراعظم عمران خان کو خط بھی لکھا گیا تھا اور ان قواعد پر تحفظات کا اظہار کیا تھا۔