مخدوم شاہ محمود قریشی کی ایرانی ہم منصب سے ملاقات، باہمی دلچسپی کےامور پر تبادلہ خیال

تفصیلات کے مطابق مخدوم شاہ محمود قریشی  کا کہنا تھا کہ پاکستان، ایران کے ساتھ دو طرفہ برادرانہ تعلقات کو خصوصی اہمیت دیتا ہے۔ ان دو طرفہ تعلقات کی بنیاد یکساں تاریخ، جغرافیائی قربت اور مشترکہ مفادات پر  قائم ہے ۔پاکستان اور ایران کے درمیان ادارہ جاتی میکنزم سے مختلف شعبہ جات میں دو طرفہ تعاون میں اضافہ ہوا ہے جبکہ پاکستان اور ایران کے مابین تجارتی و اقتصادی تعاون کے فروغ کے کثیر مواقع موجود ہیں جن سے استفادہ کرنے کی ضرورت ہے ۔

وزیرخارجہ نےتوقع ظاہرکی کہ پاک ایران باڈر مارکیٹ کے جلد قیام سے دونوں ممالک یکساں مستفید ہوں گے۔ وزیرخارجہ نے بین الاقوامی فورمز پر مسئلہ کشمیر کے حوالے سے پاکستانی موقف کی مسلسل حمایت پر، ایرانی وزیر خارجہ کا شکریہ ادا کیا

دونوں وزرائے خارجہ کے مابین خطے کی صورتحال بالخصوص افغان امن عمل پر خصوصی تبادلہ ء خیال ہوا ،وزیر خارجہ شاہ محمود قریشی کا کہنا تھا کہ پاکستان  خطے کے امن و استحکام کیلئے افغانستان میں قیام امن کو ناگزیر سمجھتا ہے۔ پاکستان کا ہمیشہ سے موقف رہا کہ افغان مسئلے کو طاقت کے ذریعے حل نہیں کیا جاسکتا۔

پاکستان افغان امن عمل سمیت ،خطے میں امن کیلئے اپنی مخلصانہ کاوشیں جاری رکھنے کیلئے پر عزم ہے۔ افغان صدر اشرف غنی نے وزیر اعظم عمران خان کی جلد صحت یابی کے لئے نیک خواہشات کا اظہار کیاہے۔