مولانا ضیاء الرحمان کی ٹارگٹ کلنگ میں ممکنہ طور پر پڑوسی ملک کی خفیہ ایجنسی کے ملوث ہونے کا شبہ

کراچی میں گزشتہ روز  مذہبی رہنما مولانا ضیاء الرحمان کی ٹارگٹ کلنگ میں ممکنہ طور پر پڑوسی ملک کی خفیہ ایجنسی کے ملوث ہونے کا شبہ ظاہر کیا جا رہا ہے، پولیس اور حساس اداروں نے اہم اجلاس طلب کر لیا۔

کراچی میں ہائی پروفائل مذہبی رہنما کی ٹارگٹ کلنگ کے حوالے سے پولیس اور حساس اداروں نے اہم اجلاس طلب کیا ہے، خفیہ ادارے کی رائے کے مطابق مولانا ضیاء الرحمان اور نجی سکول کے عہدیدار خالد شیخ کے قتل میں مماثلت ہے،ممکنہ طور پر دونوں کی ٹارگٹ کلنگ میں ایک ہی گروپ ملوث ہو سکتا ہے

گزشتہ روز شاہراہ فیصل تھانے کی حدود گلستان جوہر بلاک 16 میں نامعلوم مسلح موٹر سائیکل سواروں نے فائرنگ کرکے جامعہ ابوبکر اسلامیہ کے مہتمم مولانا ضیاء الرحمن کو قتل کیا تھا۔ ایس ایس پی ایسٹ عرفان بہادر کے مطابق مولانا ضیاء الرحمان گلستان جوہر میں چہل قدمی کر رہے تھے کہ نامعلوم افراد نے ان پر گولیاں چلا دیں۔

سی ٹی ڈی نے واقعہ کے شواہد اکھٹے کرلیے ہیں اور اجلاس میں اس کیس اور ماضی میں جتنی بھی مذہبی رہنمائوں کی ٹارگٹ کلنگ ہوئی ہیں ان کا جائزہ لیا جائے گا، اس میں جو بھی حقائق سامنے آئے تھے ان کو بھی مانیٹر کیا جائے گا