پیرس اولمپکس ، ایتھلیٹس ولیج میں حجاب پہننے پرکوئی پابندی نہیں ہوگی : آئی او سی

سوئٹزرلینڈ: انٹرنیشنل اولمپکس کمیٹی کا کہنا ہے کہ پیرس 2024 کے اولمپک گیمز کے ایتھلیٹس ولیج میں ایتھلیٹس کسی پابندی کے بغیر حجاب پہن سکیں گے۔

غیرملکی خبرایجنسی کے مطابق اولمپکس کی انتظامیہ کی جانب سے یہ بیان ایک ایسے موقع پر جاری کیا گیا جب چندروز قبل ہی فرانسیسی وزیر کھیل نے کہا تھا کہ پیرس اولمپکس میں فرانسیسی ایتھلیٹس کے حجاب پہننے پر پابندی ہوگی۔

تاہم انٹرنیشنل اولمپک کمیٹی کاکہنا ہے کہ ہمیں فرانس کی صورتحال کو بہتر طور پر سمجھنے کی ضرورت ہے اور ہم اس سلسلے میں فرانسیسی اولمپکس کمیٹی کے ساتھ رابطے میں ہیں۔

فرانسیسی وزیر کھیل ایمیلی اوڈیا کاسٹیرا نے رواں ہفتے ایک بیان میں کہا تھا کہ سیکولرازم کے اصولوں کے احترام کو مدنظر رکھتے ہوئے فرانسیسی ایتھلیٹس کو پیرس گیمز کے دوران حجاب پہننے سے روک دیا جائے گا۔

انٹرنیشنل اولمپکس کمیٹی کا کہنا ہے کہ اولمپک ولیج میں انٹرنیشنل اولمپکس کمیٹی ( آئی او سی ) کے قوانین لاگو ہوتے ہیں لہٰذا حجاب یا کوئی اور مذہبی یا ثقافتی لباس پہننے پر کوئی پابندی نہیں ہے۔