امریکہ کی 40 ریاستوں میں فیس بک اور انسٹا گرام کے خلاف مقدمہ درج

سوشل میڈیا کو لگام ڈالنے کےلئے امریکہ کا 40 ریاستوں نے اجتماعی طور پر فیس بک اور انسٹاگرام کی مالک کمپنی میٹا کے خلاف مقدمہ دائر کر دیا گیا ہے۔

مقدمے میں الزام لگایا گیا ہے کہ میٹا نے اپنے سوشل میڈیا پلیٹ فارمز کے ذریعے خاص طور پر نوجوان نسل میں ڈپریشن سمیت مختلف ذہنی صحت کے مسائل پیدا کرنے میں کردار ادا کیا ہے۔ قانونی شکایت میں دعویٰ کیا گیا ہے کہ میٹا نے جان بوجھ کر اپنے مالی فائدے کے لیے سوشل میڈیا پلیٹ فارمز کے استعمال سے وابستہ خطرات پر پردہ ڈالا اور ایسا کرتے ہوئے نوجوان صارفین کا استحصال کیا، بزنس ماڈل کے ذریعے نوجوانوں کو زیادہ وقت سوشل میڈیا پر گزارنے کی لت لگائی گئی جس سے ان کی ذہنی صحت کو نقصان پہنچا۔

شکایت میں کہا گیا ہے کہ تحقیق سے ثابت ہوا ہے نوجوانوں کا میٹا کے سوشل میڈیا پلیٹ فارمز کے استعمال کا تعلق ڈپریشن، بے چینی، بے خوابی، تعلیم اور  روزمرہ کی زندگی میں مداخلت اور  بہت سے دوسرے منفی نتائج سے ہے۔یہ شکایت 2021 میں میٹا کی اپنی تحقیق کے بعد کی گئی جس میں کمپنی کو انسٹاگرام سے نوجوانوں خصوصاً لڑکیوں کو ہونے والے نقصانات کا علم تھا۔

ان ریاستوں نے عدالت سے میٹا پر بھاری جرمانہ کرنے اور معاوضہ ادا کرنے کا حکم جاری کرنے کی درخواست کی ہے۔