لاہور سمیت مختلف شہروں میں گرج چمک کے ساتھ بارش

لاہور: لاہور سمیت پنجاب کے مختلف شہروں میں گرج چمک کے ساتھ بارش ہوئی جس کے بعد موسم کافی سرد ہوگیا ہے۔

تفصیلات کے مطابق لاہور کے مختلف علاقوں جن میں گڑھی شاہو، ایبٹ روڈ، کینال روڈ، دھرم پورہ، لکشمی چوک، نسبت روڈ، کاہنہ، گجوماتا، فیروز پور روڈ، ساندہ، کرشنا نگر، بند روڈ، اچھرہ، چونگی امرسدھو، کلمہ چوک، برکت شامل ہیں۔ بازار، گلبرگ، گلشن راوی اور دیگر علاقوں میں صبح کے وقت بادل چھا گئے۔

بارش کے بعد لاہور کا کم سے کم درجہ حرارت 15 ڈگری سینٹی گریڈ سے نیچے گر گیا جب کہ زیادہ سے زیادہ درجہ حرارت 20 ڈگری سینٹی گریڈ رہنے کا امکان ہے۔

بارش کی وجہ سے فضائی آلودگی میں بھی نمایاں کمی متوقع ہے جب کہ یہ سموگ کے اثرات سے بچاؤ میں بھی اہم ثابت ہوگی۔

بارش کے باعث نشیبی علاقے زیر آب آگئے جب کہ تیز ہواؤں نے مختلف علاقوں میں بجلی کا ترسیلی نظام درہم برہم کردیا جس سے شہریوں کو شدید پریشانی کا سامنا کرنا پڑا۔

اس کے علاوہ پاکپتن، پھالیہ، سکھیکی، وزیرآباد، مریدکے، چنیوٹ، اوکاڑہ، ساہیوال، عارف والا، بہاولنگر، نارووال، گوجرہ، جھنگ، ٹوبہ ٹیک سنگھ، سانگلہ ہل اور دیگر شہروں میں بادل برسے۔

دوسری جانب مری میں موسم سرما کی پہلی ہلکی برفباری کے بعد نومبر کے مہینے میں موسم شدید سرد ہوگیا۔

بارش، برفباری اور ٹھنڈی ہواؤں کے باعث سردی کی شدت میں اضافہ ہوگیا۔ مری انتظامیہ نے سیاحوں کو بہتر سہولیات کی فراہمی کے لیے انتظامات مکمل کر لیے۔ مختلف مقامات پر 13 سہولتی مراکز قائم کیے گئے۔ محکمہ ہائی ویز کے مشنریوں کو برف ہٹانے کے لیے الرٹ جاری کر دیا گیا ہے۔