لاہور: نگراں وزیراعلیٰ پنجاب محسن نقوی سے اٹلی کے سفیر اینڈریاس فیراریس نے ملاقات کی ۔

ملاقات میں انہوں نے ثقافت، سیاحت اور باہمی تجارت کے شعبوں میں تعاون بڑھانے پر تبادلہ خیال کیا۔

وزیراعلیٰ محسن نقوی نے کہا کہ وقت آگیا ہے کہ پاکستان اور اٹلی کے باہمی تعلقات کو مفید اقتصادی شراکت داری میں تبدیل کیا جائے، تجارتی اور ثقافتی وفود کے باہمی تبادلے سے تعلقات کو نئی جہت ملے گی۔

محسن نقوی نے کہا کہ ون ونڈو آپریشن کے ذریعے تمام این او سی ایک ہی چھت کے نیچے دستیاب ہوں گے، پنجاب میں اطالوی سرمایہ کاروں کے لیے سرمایہ کاری کے بے پناہ مواقع موجود ہیں۔

وزیراعلیٰ پنجاب نے جی ایس پی پلس اسٹیٹس کے حوالے سے پاکستان کو اٹلی کی حمایت پر اٹلی کے سفیر کا بھی شکریہ ادا کیا۔

اٹلی کے سفیر اینڈریاس فیراریس نے کہا کہ وہ پنجاب حکومت کے ساتھ مختلف شعبوں میں جاری تعاون کو فروغ دیں گے۔

سندھ کلچر ڈے کی مناسبت سے کراچی سمیت صوبے بھر میں ریلیاں اور تقریبات کا انعقاد کیا جارہا ہے۔

کراچی میں مرکزی تقریب کراچی پریس کلب کے قریب منعقد ہوگی، جس میں شہریوں کی بڑی تعداد شرکت کرتی ہے۔

جیکب آباد میں سندھی کلچر ڈی کے حوالے سے نجی اسکول میں شاندار تقریب کا انعقاد کیا جہاں پر بچوں نے ثقافتی لباس زیبِ تن کرکے ثقافت کو اجاگر کیا، ہر طرف اجرک ٹوپی اور سندھ کے ثقافت کے رنگ بکھر گئے۔

شاندار تقریب میں ثقافتی کھانے بھی تیار کئے گئے، اسکول کے بچوں نے ثقافتی لباس زیب تن کرکے ٹیبلوز پیش کئے۔

حیدرآباد میں بھی یوم ثقافت سندھ انتہائی جوش و خروش سے منایا جا رہا ہے حیدرآباد میں مرکزی اسٹیج سجایا گیا ہے جہاں نوجوان سندھی گیتوں پر والہانہ رقص کیا۔سندھی ٹوپی اجرک کے ساتھ ثقافتی دن منانے والوں نے کوئٹہ پریس کلب میں تقریب کا انعقاد کیا اور ایک دوسرے کو اجرک ٹوپی پہنا کر مبارک باد دی۔

اس دن کو منانے والوں کا کہنا تھا کہ ملک میں ثقافت کا فروغ کرے بھائی چارے کی فضا کو پروان پڑھایا جاسکتا ہے۔

اسلام آباد: نگران وفاقی وزیر صحت ڈاکٹر ندیم جان نے اتوار کو بل اینڈ میلنڈا گیٹس فاؤنڈیشن کے چیئرمین بل گیٹس سے ملاقات کی اور انہیں پاکستان سے پولیو کے خاتمے کے اقدامات سے آگاہ کیا۔

وفاقی  وزیر نے دبئی میں COP-28 کانفرنس کے موقع پر ان سے ملاقات کی اور پولیو کے خاتمے کی کوششوں میں ہونے والی پیش رفت پر تبادلہ خیال کیا۔

 ڈاکٹر ندیم جان نے پاکستان میں جاری پولیو ویکسینیشن مہم کے بارے میں آگاہ کیا۔ انہوں نے کہا کہ حکومت پاکستان میں پولیو کے خاتمے کے لیے مربوط حکمت عملی کے تحت کام کر رہی ہے۔ انہوں نے کہا کہ پاکستان پولیو وائرس کے خاتمے کے لیے تمام ضروری اقدامات کو یقینی بنا رہا ہے۔

 ڈاکٹر ندیم جان نے کہا کہ پاکستان میں بچوں تک ویکسین کی 100% رسائی کو یقینی بنانے کے لیے اقدامات کیے جا رہے ہیں۔ انہوں نے کہا کہ پولیو کے خاتمے کے بعد دیگر پروگراموں میں پولیو ورکرز کی خدمات سے استفادہ کیا جائے گا۔

انہوں نے مزید کہا کہ حکومت نے ماں اور بچے کی صحت، غذائیت اور خاندانی منصوبہ بندی کے پروگراموں میں کارکنوں کی خدمات لینے کے لیے ایک جامع منصوبہ بنایا ہے۔ بل گیٹس نے وزیر صحت کے جامع منصوبے کی تعریف کی۔ ڈاکٹر ندیم جان نے پولیو کے خاتمے کے لیے بل اینڈ میلنڈا گیٹس فاؤنڈیشن کے تعاون کو سراہا۔