پاک نیوزی لینڈ کیخلاف سیریزمیں بہترین ٹیم کے ساتھ میدان میں اتریں گے، کپتان ویمن کرکٹ ٹیم

پاکستان ویمنز کرکٹ ٹیم کی کپتان ندا ڈار نے کہا ہے کہ نیوزی لینڈ کیخلاف سیریز کیلئے بہترین ٹیم کے ساتھ میدان میں اتریں گے ،امید ہے کہ ہماری کھلاڑی کم بیک کریں گی،نیوزی لینڈ کیخلاف دونوں سیریز جیتنے کی کوشش کریں گے جس کے لئے ہمارا پلان تیار ہے،ہماری کوشش ہوتی ہے کہ بہتر سے بہتر پرفارم کریں۔

نیشنل سٹیڈیم کراچی میں پریکٹس میچ کھیلنے کے بعد پریس کانفرنس کرتے ہوئے کہا کہ کھلاڑیوں کا پول بڑا کرنے کا سوچ رہے ہیں جس میں ہمارے پاس بیٹسمین، بائولرز، آل رائونڈرز موجود ہوں،ہماری کارکردگی متاثر کن نہیں ہے،جو کھلاڑی اچھا پرفارم کریں گی ہم انہیں مزید مواقع دیں گے،

انہوں نے کہا کہ ایک یونٹ بن کر ٹیم کو کھیلنا ہے۔ بنگلادیش کیخلاف شکست کا افسوس ہوا، کھلاڑی اچھا پرفارم نہیں کر سکیں، غلطیوں سے سیکھنے کی کوشش کر رہے ہیں۔ ایشین گیمز میں اچھی وکٹس نہیں تھیں،ایشین گیمز میں ہماری ینگ ٹیم تھی اس وجہ سے اچھی کارکردگی نہیں مل سکی۔

پاکستان ویمنز کرکٹ ٹیم نیوزی لینڈ کے خلاف تین ٹی ٹوئنٹی انٹرنیشنل اور تین ون ڈے انٹرنیشنل میچوں کی سیریز کھیلنے کے لیے کراچی سے براستہ دبئی نیوزی لینڈ کے لیے روانہ ہوگی۔