لیسکو کا بجلی چووروں کے خلاف آپریشن جاری،15 ہزار سے زائد ملزمان گرفتار

وزارت توانائی پاور ڈویژن کی ہدایت کے مطابق چیف ایگزیکٹو لیسکو انجینئر شاہد حیدر کی زیر نگرانی انسداد بجلی چوری مہم کامیابی کے ساتھ جاری ہے،89 روز سے جاری آپریشن کے دوران کل 33 ہزار 444 ملزمان بجلی چوری میں ملوث پائے گئے،جن میں سے 33 ہزار 59  ملزمان کے خلاف اندراج مقدمہ کی درخواستیں جمع کروائی گئیں، 31 ہزار 896  ملزمان کے خلاف مقدمات درج کروا کر 15 ہزار 672  ملزمان کو گرفتار بھی کرلیا گیا، بجلی چوروں کو اب تک پانچ کروڑ 57  لاکھ چار یونٹس چارج کئے گئے ہیں جن کی مالیت دو ارب 18 کروڑ 17 لاکھ 32 ہزار250 روپے ہے۔

بجلی چوروں کیخلاف کئے جانے والے آپریشن میں بڑے کمرشل صارفین بھی بجلی چوری میں ملوث پائے گئے، ان تمام کے کنکشنز بھی منقطع کئے گئے اور ان کو ڈٹیکشن یونٹس چارج کئے گئے۔ نولکھا کے علاقے میں کنکشن کو 4 لاکھ 6 ہزار 972  روپے،رائیونڈ کے علاقہ میں کنکشن کو 2 لاکھ 35 ہزار 690 روپے،ساندہ کے علاقے میں کنکشن کو 2 لاکھ روپے اورشاہدرہ کے علاقے میں کنکشن کو 2 لاکھ  کی رقم چارج کی گئی ہے۔

گزشتہ 24 گھنٹوں کے دوران ریجن بھر میں 288 کنکشنز بجلی چوری میں ملوث پائے گئے،288 بجلی چوروں کے خلاف ایف آئی آرز کی درخواستیں متعلقہ تھانوں میں دائرکی گئیں جس میں سے 144 درخواستیں رجسٹرڈ ہوچکی ہیں جبکہ 15 ملزمان کو گرفتار بھی کرلیا گیا ہے۔

تمام کنکشنز منقطع کرکے ان کو تین لاکھ پینتالیس ہزار نو سو گیارہ یونٹس ڈیٹیکشن بل کی مد میں چارج کئے گئے ہیں جن کی مالیت ایک کروڑ پندرہ لاکھ تراسی ہزار چھ سو بانوے روپے ہے۔واضح رہے بجلی چوروں کیخلاف آپریشنز وفاقی پاور ڈویژن کی جانب سے دی گئی ہدایات کے مطابق کئے جا رہے ہیں اور لیسکوچیف بذاتِ خود ان آپریشنز کی نگرانی کر رہے ہیں۔

لیسکو چیف کا کہنا تھا کہ بجلی چوری کے مکمل خاتمے تک بلا تفریق گرینڈ آپریشن جاری رہے گا۔ آپریشن کے دوران بجلی چوروں کے ساتھ ساتھ ان کی سرپرستی کرنیوالے لیسکو افسران و ملازمین کو بھی قانون کے کٹہرے میں لایا جائے گا۔