لیول پلیئنگ فیلڈ، پی ٹی آئی کی شکایات پر الیکشن کمیشن کا نوٹس

پاکتان تحریک انصاف کو انتخابی عمل میں لیول پلیئنگ فیلڈ نہ ملنے کے حوالے سے الیکشن کمیشن نے ہدایت نامہ جاری کر دیا۔

پی ٹی آئی امیدواروں کو کاغذات نامزدگی حصول اور جمع کرنے میں مشکلات سے متعلق کاغذات نامزدگی چھینے کے معاملے کا الیکشن کمیشن نے نوٹس لیتے ہوئے صوبائی الیکشن کمشنرز، چیف سیکریٹریز اور آئی جیز کو مراسلے ارسال کردیئے اور الیکشن کمیشن نے حکم دیا کہ ایکشن لے کر آگاہ کیا جائے۔

پی ٹی آئی کو لیول پلیئنگ فیلڈ نہ ملنے کے معاملے پر سپریم کورٹ کی ہدایت پر پی ٹی آئی وفد نے چیف الیکشن کمشنراورممبرز سے ملاقات کی اورخدشات سامنے رکھے، الیکشن کمیشن نے وفد کو تحفظات دور کرنے کی یقین دہانی کروائی۔

پی ٹی آئی وفد کی ملاقات کے فورا بعد الیکشن کمیشن نے صوبائی الیکشن کمشنرز، چیف سیکریٹریز، کمشنراسلام آباد، آئی جی سندھ اور اسلام آباد کو مراسلے جاری کردیئے۔

مراسلے میں کہا گیا کہ الیکشن کمیشن کو اہم امیداروں کو کاغزات نامزدگی حصول اور جمع کرانے کے حوالے سے شکایات موصول ہوئی ہیں، کاغذات نامزدگی چھینے کے واقعات بھی رپورٹ ہوئے ہیں۔

الیکشن کمیشن نے کہا کہ قانون کے تحت ایکشن لے کر کمیشن کو آگاہ کیا جائے، خطوط سیکریٹری الیکشن کمیشن عمر حمید نے ارسال کیے۔

شعیب شاہین نے بتایا کہ ہم نے ملاقات میں انٹرا پارٹی الیکشن میں بلے کے انتخابی نشان کا پوچھا کہ ابھی تک فیصلہ کیوں نہیں آیا؟ جس پرالیکشن کمیشن نے کہا کہ رات 12 سے پہلے فیصلہ جاری کردیا جائے گا۔