پی ایس ایل 6: بھارت سے ابوظہبی سفر کیلئے جنوبی افریقی کھلاڑیوں ،اسٹاف کو ویزے جاری

پی سی بی  کی جانب سے جاری اعلامیے کے مطابق جنوبی افریقہ سے تعلق رکھنے والے تمام کھلاڑیوں اور سپورٹ اسٹاف کو ویزے جاری کردیے گئے ہیں۔ پاکستان سپر لیگ 6 میں شریک کھلاڑیوں، اسپورٹ اسٹاف، براڈکاسٹرز اور آفیشلز کے ویزے جاری کردئیے ۔ پاکستان سے بذریعہ چارٹرڈ فلائیٹ پر یو اے ای روانہ ہونے والے بیشتر افراد کے ویزے بھی جاری ہوچکے ہیں ۔ 27 مئی کو ابوظہبی کے ہوٹل میں چیک ان کرنے پر روم آئسولیشن کا پہلا دن شمار کیا جائے گا۔جنوبی افریقہ کے فاف ڈوپلیسی، ڈیوڈ ملر اور ہرشل گبز سمیت رائیلی روسو، کیمرون ڈیلپورٹ، مائیکل اسمتھ کے ویزے جاری ہوگئے ہیں۔

خیال رہے کہ گزشتہ روز پاکستان کرکٹ بورڈ(پی سی بی) کے ترجمان کا کہنا تھا کہ جنوبی افریقا اور بھارت سے سفر کرنے والوں کے ویزے تاخیر کا شکار ہیں، ‏بھارت اور جنوبی افریقا کے چند افراد کے ویزے جاری ہونا باقی ہیں امید ہے آج رات تک باقی افراد کے ‏ویزے بھی جاری ہو جائیں گے۔ ترجمان نے واضح کیا تھا کہ ویزے مکمل ہوتے ہی بھارتی اور جنوبی افریقی  آفیشلز ابوظہبی پہنچیں گے، ‏ویزوں کا عمل مکمل ہوتے ہی میچز کا شیڈول جاری کر دیا جائے گا۔

واضح رہے کہ پی ایس ایل 6 کے بقیہ میچز کا جون کے مہینے میں ابوظہبی میں انعقاد کرایا جائے گا۔