پی ایس ایل 9:افتتاحی میچ کا میدان آج سجے گا

لاہور: پاکستان سپر لیگ (پی ایس ایل) کے نویں سیزن کے پہلے میچ میں لاہور قلندرز اور اسلام آباد یونائیٹڈ کی ٹیمیں ہفتے کو رات 8 بجے قذافی اسٹیڈیم لاہور میں آمنے سامنے ہوں گی۔

سٹیڈیم میں ہونے والے میچ کی تیاریاں مکمل کر لی گئی ہیں۔ لاہور اور اسلام آباد کی ٹیموں کے کھلاڑی اور آفیشلز پنڈال پہنچیں گے۔

اسٹیڈیم اور گردونواح میں سیکیورٹی کے سخت انتظامات کیے گئے ہیں، آج کے میچ کی سیکیورٹی کے لیے 900 سے زائد سیکیورٹی اہلکار قذافی اسٹیڈیم میں تعینات کیے گئے ہیں۔

میچ سے قبل ٹورنامنٹ کا آغاز رنگا رنگ افتتاحی تقریب سے ہوگا جس میں ملک کے نامور فنکار اپنے فن کا مظاہرہ کریں گے جب کہ شائقین کے لیے آتش بازی اور لیزر شو کا بھی اہتمام کیا جائے گا۔

پاکستان سپر لیگ کی افتتاحی تقریب شام 6:30 بجے قذافی اسٹیڈیم لاہور میں شروع ہوگی۔ شائقین کرکٹ کی انٹری دوپہر 3:30 بجے شروع ہوگی۔ افتتاحی تقریب میں گلوکار علی ظفر، آئمہ بیگ، عارف لوہار اور نوری پرفارم کریں گے۔