معروف کالم نگار انور مقصو دنے اپنے اغواء کی خبروں کی تردید کردی

لاہور: معروف سینئر اسکرپٹ رائٹر، میزبان اور مزاح نگار انور مقصود نے اپنے اغوا کے حوالے سے سوشل میڈیا پر چلنے والی جھوٹی خبروں کی تردید کردی۔

انور مقصود نے اغوا کی افواہوں پر شدید غم وغصے کا اظہار کرتے ہوئے کہا کہ میں اس قسم کی قیاس آرائیوں سے بہت پریشان ہوں اور سو نہیں سکتا۔

انور مقصود نے کہا کہ اس غلط معلومات کی وجہ سے انہیں شرمندگی کا سامنا کرنا پڑا کیونکہ انہیں اپنے مداحوں کی جانب سے نیک تمنائیں موصول ہوئی تھیں۔ انہوں نے کہا کہ جو بھی پروپیگنڈہ کیا جاتا ہے اس کا ان سے کوئی تعلق نہیں ہے۔

مصنف نے مزید کہا کہ پاکستانی ہونے کے ناطے انہیں اپنے فوجیوں سے بے پناہ محبت ہے جو ملک کی خودمختاری کے لیے اپنی جانیں قربان کرتے ہیں۔ انہوں نے کہا کہ جب ان کے پاس ایک کیمرہ بھی نہیں ہے تو وہ کوئی ٹویٹ کیسے کر سکتے ہیں۔

جھوٹی خبروں پر ردعمل دیتے ہوئے مقصود نے کہا کہ سوشل میڈیا پر ان کی تصویر والے 42 اکاؤنٹس چل رہے ہیں اور یہ سب جعلی ہیں۔ میں نے ایف آئی اے اور پولیس سے شکایت کی اور ان اکاؤنٹس کو بند کرنے کو کہا۔ لوگوں کو معلوم ہونا چاہیے کہ کوئی خاص سیاسی جماعت اپنے مقاصد حاصل کرنے کے لیے کس حد تک جا سکتی ہے۔ 

انور مقصود نے مزید کہا کہ یہ تمام افواہیں جھوٹی اور بے بنیاد ہیں ، انہوں نے خبروں پر ردعمل ظاہر کرتے ہوئے مداحوں سے درخواست کی کہ ایسی جعلی خبروں پر کان نہ دھریں، میرا نہ تو سوشل میڈیا پر کوئی اکاؤنٹ ہے اور نہ میں سوشل میڈیا دیکھتا ہوں، لوگ مجھے فون کرکے بتا رہے ہیں کہ میرے اغوا کے حوالے سے خبریں آرہی ہیں۔