شرجیل میمن کا عید الفطر کے بعد کراچی کے مزید روٹس پر بسیں چلانے کا اعلان

کراچی: صوبائی وزیر ٹرانسپورٹ سندھ شرجیل میمن نے عید الفطر کے بعد کراچی کے مزید روٹس پر بسیں چلانے کا اعلان کردیا۔

کراچی میں پریس کانفرنس کرتے ہوئے شرجیل میمن کا کہنا تھا کہ چیئرمین پاکستان تحریک انصاف (پی پی پی) بلاول بھٹو اور صدر آصف علی زرداری نے ٹرانسپورٹ انفراسٹرکچر پر توجہ دینے کی ہدایت کی ہے۔

انہوں نے کہا کہ پنک  بسوں کی تعداد میں بھی اضافہ کیا جائے گا، گرین بسیں چلنا شروع ہو گئی ہیں جبکہ کچھ نئی بسیں بھی آ چکی ہیں جو جلد سڑکوں پر بھی آئیں گی، عید کے بعد الیکٹرک بسوں کے دو نئے روٹس بھی شروع کیے جائیں گے۔

وزیر ٹرانسپورٹ نے عید کے بعد میرپورخاص میں پیپلز بس سروس شروع کرنے اور 18 اپریل سے کراچی کے دو روٹس پر کارڈ سسٹم متعارف کرانے کا بھی اعلان کیا۔

شرجیل میمن نے ریڈ لائن منصوبے پر بات کرتے ہوئے کہا کہ مہنگائی اور قیمتوں میں اضافے کے باعث ریڈ لائن بی آر ٹی کا کام متاثر ہوا جب کہ نگراں حکومت نے ریڈ لائن بی آر ٹی پر توجہ نہیں دی۔

وزیر ٹرانسپورٹ نے کہا کہ سندھ کے ہر ضلع میں پیپلز بس سروس شروع کی جائے گی اور 500 نئی بسیں خریدی جائیں گی۔ ہم عوام کو ریلیف دینے کے لیے بہترین اور سستی سفری سہولیات فراہم کرنا چاہتے ہیں۔ عوام کو دی گئی تمام خوشخبری پر عمل کیا جائے گا۔