جی سیون ممالک میں بڑی ٹیکنالوجی کمپنیوں پر ٹیکس لگانے پر اتفاق

غیر ملکی خبر رساں ادارے کے مطابق دنیا کے امیر ترین ملکوں نے کورونا وبا کے معاشی اثرات پر قابو پانے کے لیے بڑی کمپنیوں سے  کم از کم گلوبل کارپوریٹ ٹیکس کے علاوہ  مقامی مارکیٹ میں بھی ٹیکسوں پر اتفاق کیا ہے۔جی سیون  ممالک کے وزرائے خزانہ کے لندن میں ہونے والے اجلاس میں شرکا کم سے کم کارپوریٹ ٹیکس 15 فیصد رکھنے کے اصول پر متفق ہو گئے ہیں۔ جس سے ان امیر ملکوں کو اربوں ڈالر ٹیکسوں کی مد میں ملیں گے ۔

جی سیون ممالک نے ایمازون، ایپل اور گوگل سمیت دیگر بڑے ڈیجیٹل پلیٹ فارمز پر عالمی ٹیکس لگانے کا فیصلہ کیا  ہے۔

  گلوبل کارپوریٹ ٹیکس کا معاہدہ لندن میں جی سیون ممالک کے وزرا خزانہ کے اجلاس میں ہوا ہے۔  برطانوی وزیر خزانہ نے اس  معاہدے کو تاریخی قرار دیا   ہے۔ اس معاہدے کے بعد جی سیون ملکوں میں بڑی ٹیکنالوجی کمپنیوں پر عائد نیشنل ڈیجیٹل سروسز ٹیکس ختم کر دیا جائے گا ۔ اس معاہدے پر وسیع اتفاق رائے کے لیے معاہدہ اگلے ماہ جی 20 اجلاس میں پیش کرنا پڑے گا ۔ جی 20 میں ابھرتی معیشتیں بھی شامل ہیں ۔

رشی سونک نے کہا کہ اس کارپوریٹ ٹیکس کے نظام کو اس طرح ترتیب دیا گیا ہے کہ عالمی کمپنیوں کو دنیا بھر میں ایک ہی انداز کا ٹیکس دینا پڑے۔ کئی برسوں سے جاری بحث و مباحثے کے بعد G-7 کے وزرائے خزانہ عالمی سطح کے ٹیکس کے نظام کی اصلاح کرنے کے تاریخی معاہدے پر متفق ہوئے ہیں تا کہ اسے آج کے ڈیجیٹل دور کے مطابق از سرِ نو وضع کیا جا سکے۔