بلوچستان میں 3 جون سے انسداد پولیو کی مہم کا آغاز

بلوچستان میں انسداد پولیو کی مہم بروز پیر3 جون سے شروع ہو گی ۔مہم کے دوران 20 اضلاع میں مجموعی طور پر 18لاکھ84ہزار سے زائد بچوں کو پولیو سے بچاو کے قطرے پلائے جائیں گے۔

ایمرجنسی آپریشن سینٹر بلوچستان کے کوارڈینٹر سید زاہد شاہ نے کہا ہے کہ انسداد پولیو کی مہم 3 جون سے بلوچستان کے اضلاع،کوئٹہ، پشین،قلعہ عبداللہ،چمن،حب، چاغی، دکی،لسبیلہ، خضدار، ژوب، نوشکی، قلعہ سیف اللہ، لورالائی اور مستونگ میں شروع کی جارہی ہے۔

زاہد شاہ کا کہنا تھا کہ شدید گرمی اور ہیٹ ویو کی پیشگوئی کے تناظر میں نصیرآباد، سبی،جعفرآباد، اوستہ محمد، ڈیرہ بگٹی اورصحبت پور میں 8 جون سے مہم شروع ہوگی، مہم کی تمام تیاریاں مکمل کر لی گئی ہیں۔

انہوں نے تمام والدین سے اپیل کی کہ صوبے میں پولیو کیس کی موجودگی کی وجہ سے والدین اس خصوصی مہم میں پولیو ٹیم کے ساتھ اپنے تعاون کو یقینی بنائیں کیونکہ اس خصوصی مہم کا مقصد حالیہ پولیو وائرس کی موجودگی کی بناء پر کیا جا رہا ہے۔ ماحول میں پولیو وائرس کی موجودگی کے باعث پولیوکی اس خصوصی مہم کا آغا ز کیا جارہا ہے۔

انہوں نے کہا کہ سول سوسائٹی، اساتذہ اور علماء کرام خصوصی طور پر اس خصوصی مہم میں اپنے تعاون کو یقینی بنائیں۔واضح رہے کہ بلوچستان میں تین سالوں کے بعدتین پولیوکے کیسز چمن، ڈیرہ بگٹیاو ر قلعہ عبداللہ سے رپورٹ ہوئے ہیں۔ پولیو ورکرز نے ہرطرح کے سخت ترین موسمی حالات کے باوجود قومی فریضہ کی ادائیگی میں اپنے فرائض احسن طریقے سے نبھائے ہیں، معمول کے حفاظتی ٹیکہ جاتی نظام کو بھی مضبوط بنیادوں پر استوار کیا جارہا ہے۔

سید زاہد شاہ نے کہا کہ پولیو مہم کے دوران7 ہزار636 کے قریب ٹیمیں حصہ لیں گی۔جن میں 5ہزار933 موبائل ٹیمیں،519فکسڈسائٹ او ر429ٹرانزٹ پوائنٹس شامل ہیں۔