ساہیوال ہسپتال میں آتشزدگی سے متاثرہ جاں بحق بچوں کی تعداد4 ہوگئی

ساہیوال کے ٹیچنگ ہسپتال میں آگ لگنے کی وجہ سے زیر علاج مزید 2بچے دم توڑ گئے۔

ساہیوال کے ڈسٹرکٹ ہیڈ کوارٹر اینڈ ٹیچنگ ہسپتال میں گزشتہ روز چلڈرن وارڈ میں آگ لگنے کا واقعہ پیش آیا، آتشزدگی کے نتیجے میں پیدا ہونے والے دھوئیں کی وجہ سے 2 بچے زندگی کی بازی ہار گئے جبکہ متعدد بچے متاثر ہوئے تھے۔

آگ لگنے کے دوران 75 میں سے 69 بچوں کو دوسرے وارڈ میں شفٹ کر دیا گیا تاہم کئی گھنٹے گزرنے کے بعد مزید 2 متاثرہ بچے دم توڑ گئے ہیں جس کے بعد مرنے والوں بچوں کی مجموعی تعداد 4 ہو گئی، وزیر اعلیٰ پنجاب مریم نواز نے بھی ہسپتال میں آتشزدگی کا نوٹس لے لیا ہے۔

ریسکیو 1122 کے مطابق وارڈ میں آگ شارٹ سرکٹ کے باعث لگی، اسپتال عملے اور گارڈ نے بچوں کو محفوظ جگہ پر منتقل کیا۔

وزیر اعلیٰ پنجاب مریم نواز شریف نے کمشنر ساہیوال سے رپورٹ طلب کر لی اور سوگوار خاندان سے دلی ہمدردی و اظہار تعزیت کرتے ہوئے کہا کہ واقعہ کی مکمل تحقیقات کرائی جائیں اور ذمہ داروں کا تعین کر کے سخت کارروائی کی جائے، دکھ کی گھڑی میں سوگوار خاندان کے ساتھ ہیں۔