زینب جمیل قاتلانہ کیس:ملزم کی ضمانت منظور

پاکستان کی سابقہ اداکارہ و ماڈل زینب جمیل پر قاتلانہ حملے میں اہم پیشرفت ہوئی ہے۔ عدالت نے سابقہ اداکارہ زینب جمیل کے قاتلانہ حملے میں ملوث مرکزی ملزم کی ضمانت منظور کر لی۔

ذرائع کے مطابق مذہب اسلام کی خاطر شوبز انڈسٹری کو خیر باد کہنے والی پاکستانی اداکارہ و ماڈل زینب جمیل پر جان لیوا حملے میں ملوث ملزم انکے شوہر محمد جمیل کی ضمانت منظور کرتےہوئے گرفتاری سے روک دیا۔

لاہور کی سیشن عدالت نے زینب جمیل پر قاتلانہ حملے سے متعلق کیس کی سماعت کی۔ ایڈیشنل سیشن جج قمر عباس نے سماعت کرتے ہوئے ملزم شوہرمحمد جمیل کی عبوری ضمانت منظور کر لی ہے ۔

ملزم محمد جمیل کو 20 جون تک عدالت نے گرفتارنہ کرنےکا حکم دے دیا ہے، دوسری جانب ملزم کو شامل تفتیش ہونے کا حکم دے دیا ہے۔

علاوہ ازیں عدالت نے کیس کی آئندہ سماعت پر پولیس سے رپورٹ بھی طلب کرلی ہے۔

یاد رہے کہ گزشتہ ماہ لاہور کے علاقے ڈیفنس میں زینب جمیل پر قاتلانہ حملہ اس وقت ہوا جب وہ اپنے سیلون کے باہر اپنی گاڑی میں آ کر رکی ہی تھیں، اسی دوران 2 موٹر سائیکل سوار حملہ آور فائرنگ کر کے موقع سے فرار ہو گئے تھے۔

اداکارہ زینب جمیل کو اس حملے میں 6 گولیاں لگی تھیں، ہسپتال میں علاج کے دوران انہوں نے اپنے شوہر پر حملے کا الزام لگایا تھا۔لاہور کے تھانہ ڈیفنس میں پولیس نے انکے شوہر محمد جمیل کے خلاف مقدمہ درج کر کے تحقیقات شروع کر دیں تھیں۔